Knıjevskıı qoımasyndaǵy aqaý: Aqqan sý deńgeıi tómendedi
ALMATY OBLYSY. QazAqparat - Almaty oblysyndaǵy Knıjevskıı qoımasynan aqqan sý deńgeıi tómendedi. Bul jaıynda Jambyl aýdandyq tótenshe jaǵdaılar bóliminiń bastyǵy, azamattyq qorǵanys podpolkovnıgi Aıbek Janaev málim etti, dep habarlaıdy QazAqparat tilshisi.
«22 qarasha kúni saǵat 7:30-da Jambyl aýdanynda, Myńbaev aýdanyna taqaý mańdaǵy Knıjevskıı sý qoımasynan aqqan sýdyń deńgeıi tómendedi. Sý eni 4 metr bolatyn jyryq arqyly aǵyp jatyr. Aǵyp jatqan sýdyń kólemi 5-6 tekshe metrdi quraıdy. Sonymen qatar oblystyq joldan tereńdigi 5 santımetr , al endi 30 metr kóleminde asyp tógilýde. Zardap shekkender men qaza tapqandar joq. Qurylys nysandaryna da eshqandaı qater baıqalmaıdy. Ahýal turaqty, sý tómendep, baıaý aǵyp jatyr», - dedi Aıbek Janaev.
Eske salsaq, buǵan deıin Almaty oblysy Jambyl aýdany Myńbaev aýylynyń mańynda Knıjevskogo sý qoımasy bógetinde jaryq paıda bolǵany týraly habarlaǵan bolatynbyz.