Kimmen bolsa da qarsylasýǵa daıynbyz – Áıelder boksynyń bas bapkeri

PARIJ. KAZINFORM – Búgin Frantsııa astanasy Parıj qalasynda bokstan Olımpıada oıyndarynyń jerebe tartý rásimi ótti. Atalǵan sharadan keıin áıelder quramasynyń bas bapkeri Eldos Saıdalın shaǵyn suhbat berdi.

«Jerebe tartylyp alǵashqy qarsylastarymyz anyqtaldy. Nátıjesin ózderińiz kórdińizder. Bul – Olımpıada, eshqashan osal qarsylas bolmaıdy. Olımpıadaǵa bokstasamyz dep keldik. Jerebe jeńil tússe de, aýyr tússe de eshkimnen qashyp qutyla almaımyz. Sol úshin kimmen bolsa da qarsylasýǵa daıynbyz», - dedi bas bapker Eldos Saıdalın Kazinform tilshisine bergen suhbatynda.

Sonymen qatar, bas bapker shákirtteriniń múmkindigi týraly da aıta ketti.

«50 men 57 keli salmaqta 22 boksshydan bolsa, 75 keli salmaqta 16 boksshy qyz judyryqtasady. Osydan-aq, kimge qandaı múmkindik baryn baǵamdaı berýge bolady. Jalpy, bizge eshqashan bosańsýǵa, sharshy alańda qatelesýge bolmaıdy», - dedi bas bapker.

Aıta ketsek, osyǵan deıin qazaq dzıýdoshylarynyń qarsylastary belgili bolǵanyn jazǵan bolatynbyz.

Esterińizge sala keteıik, Frantsııa astanasy Parıj qalasynda ótetin XXXIII jazǵy Olımpıada oıyndary 26 shilde men 11 tamyz aralyǵynda ótedi. Oıyndarǵa álemniń 205 elinen 10 500 sportshy qatysady dep josparlanǵan.