«QMG» Ulttyq kompanııasy men «Kazenergy» Astanadaǵy qazaq-túrik lıtseıinde ashyq sabaq ótkizdi

Salalyq synyptaǵy aǵymdaǵy jylǵy alǵashqy sabaqty Investıtsııalardyń tabystylyǵyn zartteý jónindegi agenttiktiń taldaýshysy Oljas Baıdildınov ótkizdi. Ol Meksıka shyǵanaǵyndaǵy ekologııalyq apat týraly áńgimelep, teńizde munaı óndirýdiń ekonomıkalyq, tehnologııalyq jáne ekologııalyq aspektilerin aıtyp berdi.

Ótken jyldyń qyrkúıek aıynda lıtseı oqýshylary úshin «QazMunaıgaz»-«Kazenergy» oqý synyby ashylyp, oǵan hımııalyq reaktıvter men aqparattyq taqtalar satyp alyndy. Synypta «QazMunaıGaz» kompanııasynyń mamandary men munaı-gaz salasynyń taldaýshylary dárister oqıdy.

Elbasynyń «Bolashaqtyń irgesin birge qalaımyz!» Joldaýyn, sonyń ishinde memlekettik tildi damytýdy júzege asyrý sharalary aıasynda uıymdastyrýshylar qazaq-túrik lıtseı oqýshylaryna qazaq tiliniń orfografııalyq sózdikterin syıǵa tartty.

Qazaq-túrik lıtseıi - halyqaralyq bilim berý standarttaryna negizdelgen joǵary deńgeıdegi bilim ordasy. Bilim berý tórt: qazaq, aǵylshyn, túrik jáne orys tilderinde júrgiziledi. Lıtseı túlekteri bilimderin Qazaqstan, Reseı, Ulybrıtanııa, Túrkııa, Qytaı jáne Polshanyń joǵary oqý oryndarynda jalǵastyrýda.