QMG UK men QMG BÓ Kaspııdegi offshorlyq bloktarǵa qatysý múmkindigi týraly memorandýmǵa qol qoıdy
ASTANA, 26 mamyr. QazAqparat - «QazMunaıGaz» UK AQ jáne «QazMunaıGaz» Barlaý Óndirý» AQ arasynda QMG BÓ-ge birqatar munaıgaz jobalarynyń, onyń ishinde Kaspıı teńiziniń qazaqstandyq sektorynda ornalasqan bloktardyń geologııalyq-geofızıkalyq jáne qarjy-ekonomıkalyq málimetterin alýǵa ruqsat berýdi qarastyratyn ózara túsinistik memorandýmyna qol qoıǵanyn habarlaıdy.
Jobalardyń qataryna, atap aıtqanda «Jambyl», «Ústirt» («Óli Qoltyq»), «Jeńis», «Godına», «S-1» jáne «S-2», sondaı-aq «Óriktaý» sııaqty jáne basqa da teńiz bloktary kiredi. Taraptardyń kelisimi boıynsha munaıgaz jobalarynyń qorjyny keńeıýi múmkin.
Alynǵan málimetterdiń negizinde Kompanııa osy jobaǵa óziniń qatysýyn qaraý maqsatynda atalǵan jobalardyń ınvestıtsııalyq tartymdylyǵyna tehnıkalyq-ekonomıkalyq jáne kommertsııalyq baǵa beredi, odan keıin QMG UK men QMG BÓ tıisti konsýltatsııalar júrgizedi. Másele oń sheshilgen jaǵdaıda QMG BÓ bul jobalarǵa basqa da kompanııalarmen teń kommertsııalyq sharttarmen qatysady.
QMG UK Basqarma tóraǵasy Qaıyrgeldi Qabyldın: «Kaspıı teńiziniń qaırańyn ıgerýge iri halyqaralyq munaı kompanııalarymen qatar QMG BÓ-niń tájirıbesi men resýrstaryn tartý - bul «QazMunaıGaz» kompanııalar toby úshin mańyzdy qadam. Atalǵan jobalardy óz kúshimizben júzege asyrý munaıgaz salasyndaǵy elimizdiń strategııalyq múddelerine sáıkes keledi» - dep atap ótti.
Al QMG BÓ bas dırektory Asqar Baljanov: «Memorandýmǵa qol qoıý kómirsýtegi óndirisin arttyryp, resýrstyq bazany ulǵaıtý maqsatynda Kaspıı qaırańyn ıgerýge qatysýdy qarastyratyn bizdiń Strategııamyzdy júzege asyrýdaǵy mańyzdy qadam bolyp tabylady. QMG BÓ teńizdegi munaı operatsııasyn júrgizýge qajetti barlyq tehnıkalyq jáne qarjylyq resýrstarǵa ıe», - dep málimdedi.
