QMG tóraǵasynyń orynbasary Dáýletjan Hasanov: Talap kún saıyn ózgerip otyrsa, kelissóz júrgizý qıyn
- Dáýletjan Keńesuly, kelissóz qalaı júrip jatyr, qaı kezeńge keldi?
- Kelissóz jalǵasyp jatyr. Jalpy alǵanda, qarama-qaıshylyq týdyryp otyrǵan bir nárse – «BerAlı» qyzmetkerleri talaptarynyń quqyqtyq normalarǵa qaıshy keletin tustary.
Qansha qalaǵanymyzben, olardyń talaptaryn tolyǵymen 100% oryndaı almaımyz.
- Qaıshylyq týdyrǵan naqty ne nárse?
- Birinshiden, biz bul jaıly osyǵan deıin de birneshe ret aıtqanbyz, BerAlıdiń burynǵy jumysshylaryn «Ózenmunaıgazǵa» nemese onyń merdiger uıymdaryna jumysqa ornalastyrý. Qalanyń ózi osy kásiporynnyń negizinde qurylǵan. Kompanııaǵa jumysqa ornalasý kezeginde 10 myńǵa jýyq adam tur. Onyń ústine, kezekke turý úshin ol adamdar qalanyń kommýnaldy kásiporyndarynda jumys isteıdi.
Biz qazir kezekti aınalyp ótip, 200 adamdy jumysqa alsaq, qala turǵyndary ne deıdi? Bul sheshimge adamdardyń kóńili tolmaıtyny anyq.
Ekinshiden, tenderdiń nátıjesin joqqa shyǵaryp, tapsyrysty bir kózden BerAlıge berý talabyn oryndaý múmkin emes. Tender zańdy túrde ótti, tekserý osyndaı qorytyndyǵa keldi. Onyń nátıjesin joqqa shyǵarýǵa zańdy negiz joq. Biz qazir solaı jasaýǵa sheshim qabyldasaq, basqa da munaı servıs kompanııalary osy jolmen áreket etetin bolady.
- Sonda jumysshylarǵa ne usynyp otyrsyzdar?
- Biz olardyń jalaqysy men áleýmettik paketin saqtaı otyryp, birneshe kompanııadan jumys ornyn usynyp otyrmyz.
- Jumysshylar bul usynystardan nege bas tartyp otyr?
- Sebepteri ártúrli: birinde jaǵdaıdy unatpady, kelesi birinde kompanııanyń ózi, taǵy bireýiniń tehnıkalyq jabdyqtaýy kóńilderinen shyqpady… faktor kóp jáne kún saıyn jańasy paıda bolady.
Syrttan qaraǵanda, bastamashyl top jumysshylardyń múddesin emes, belgili bir merdigerdi jaqtap turǵandaı kórinýi múmkin.
- Bul jaǵdaıdan shyǵýdyń jolyn qalaı kóresiz?
- Bul máseleni sheshýdiń bir ǵana joly – zań aıasynda qarastyrý. Zań tártibi bir ret buzylsa, pretsedent retinde enip, keleshekte onyń qaıtarymsyz saldary bolýy múmkin.
Jalpy alǵanda, bul jaǵdaı eńbek daýy da emes. Óıtkeni eńbek daýy jumys berýshi men qyzmetker arasynda bolady. Bizdiń jaǵdaıda áńgime qyzmetke tapsyrys berýshi – Ózenmunaıgaz ben merdiger – BerAlı týraly bolyp otyr.
Kompanııanyń tenderden utylǵany túsinikti, biraq ekonomıkadaǵy qaǵıda osy. Odan bólek taǵy qatysqan 6 kompanııa bar. Bireý jeńedi, bireý utylady.
Alaıda, qyzmetkerlerdi jumyssyz qaldyrý týraly, tipti, sóz bolmady. Sondyqtan olarǵa birden jumys oryndary usynyldy. Mundaı jaǵdaı basqa salada kezdespeıdi.
Jalpy, QMG-niń ortalyq keńsesi bul janjalda ekinshi tarap bolmaýy da kerek.
Jaǵdaıdy eskere otyryp, biz komıssııa qurdyq, memlekettik organdardy tartyp, jumys berýshi kompanııalardy shaqyrttyq.
Biz munda osynyń barlyǵyn talqylap jatqanda, Jańaózende qansha adam jumyssyz otyr. Olar úshin ár kún mańyzdy, kúnkóris qamy bar, azyq-túlik pen kommýnaldy qyzmetterdi tóleý qajet.
Kelissóz ádeıi sozylyp jatqandaı áser qaldyrady.
- Áńgimeńizge rahmet.
Eske sala keteıik, 10 sáýirde Energetıka mınıstrligi ǵımaratynyń aldyna 70-ke jýyq jańaózendik munaıshy jınaldy.
Energetıka mınıstri Almasadam Sátqalıev Úkimet otyrysynan keıin BAQ ókilderine bergen suhbatynda vedomstvo ǵımaratynyń mańaıynda túnep shyqqan jańaózendik jumysshylardyń talaby boıynsha resmı sheshim ázirlenip jatqanyn aıtty.
Bul máselege pikir bildirgen vıtse-premer Altaı Kólginov zań aıasynda áreket etý qajettigin, «tenderden utylǵan kompanııanyń qaıtadan utyp shyqqanyn talap etý» durys emestigin aıtty.
11 sáýir keshkisin Energetıka mınıstrligi aldyna jınalǵan bir top jańaózendik munaıshylardy polıtsııa ustap áketti.
Keıin narazylyqqa shyqqan munaıshylardyń kóshbasshylary málimdeme jasap, eki jaq kelisimge kelgenin habarlady.
12 sáýirde munaıshylar Jańaózenge qaıtty.
Bir aptadan beri QazMunaıGaz ben munaıshylar ortaq kelisimge kelý úshin máseleni talqylap jatyr.
Búgin QMG basshysy Maǵzum Myrzaǵalıev ekijaqty kelissóz jaıynda pikir bildirdi.
