QMG kompanııalar tobynda óndiris qyzmetkerlerine eńbekaqy tóleýdiń biryńǵaı júıesin qurý máselesi qarastyrylyp jatyr
Bul týraly QMG baspasóz qyzmetinen habarlady.
Kásipodaq birlestikteriniń jetekshileri men QMG kompanııalar tobynyń eńbek ujymdarynyń ókilderi shaqyrylǵan keńes jumysyna QR Kásipodaqtary federatsııasy tóraǵasynyń orynbasary Qaırat Amandyqov, «KAZENERGY» munaı-gaz jáne energetıkalyq keshender uıymdarynyń qazaqstandyq assotsatsııasynyń atqarýshy dırektory Toǵjan Qojalıeva, QMG apparat basshysy Andar Shoqpytov qatysty.
Kún tártibinde QMG kompanııalar tobynyń áleýmettik saıasatyndaǵy basty máseleler qaraldy. Solardyń biri - QMG kompanııalar tobynda óndiris qyzmetkerlerine eńbekaqy tóleýdiń biryńǵaı júıesin qurý jáne QMG qyzmetkerlerin áleýmettik qorǵaýdyń qalybyn qalyptastyrý máselesi. Ústimizdegi jyly ulttyq kompanııa mamandarynan qurylǵan jumysshy toby enshiles jáne táýeldi kásiporyndarda eńbekaqy tóleý jaıyn jan-jaqty zertteý jóninde kóptegen jumys atqardy. Eńbek ujymdarynda kezdesýler uıymdastyryldy. QMG kompanııalar tobyna kiretin kásiporyndar men bólimshelerdiń ártúrli deńgeıdegi qyzmetkerleri men basshylarynyń eskertýleri esepke alyndy.
Jaqyn kúnderde tolyq jasalyp bitetin Biryńǵaı eńbekaqy tóleý júıesiniń avtorlary bul júıeniń artyqshylyqtaryna qazirdiń ózinde senimdi. Ol kompanııa tobyndaǵy barlyq bólimshelerdiń áleýmettik turaqtylyǵyn qamtamasyz etetin bolady. QMG mamandarynyń aıtýyna qaraǵanda, jańa júıe teńgermeshildikti joıyp, QMG kompanııalar tobyna kiretin kásiporyndar men bólimshelerde eńbekaqy ár kásiporynnyń óndiristik kórsetkishine qaraı belgilenetin bolady.
Keńeske qatysýshylar 2014-2016 jyldarǵa arnalǵan Qazaqstan Respýblıkasy munaı jáne gaz kesheni qyzmetkerleri kásipodaǵynyń Salalyq kelisimshartyn jasaý jóninde óz usynystaryn bildirdi. QMG kásipodaq aktıvi júz myńnan astam munaıshylar men gaz óndirýshilerdiń, kóptegen servıstik jáne munaı óńdeýshi kásiporyndar ókilderiniń basyn quraıtyn respýblıkalyq qoǵamdyq birlestik mártebesindegi munaı jáne gaz ónerkásibi qyzmetkerleriniń biryńǵaı salalyq kásipodaǵyn qurý ıdeıasyn usyndy.
QR Kásipodaqtary federatsııasy tóraǵasynyń orynbasary Qaırat Amandyqov bul ıdeıany qoldaıtyndyqtaryn aıta kelip, mundaı uıymnyń qurylýy «QazMunaıGaz» UK AQ-ynda áleýmettik beriktikti nyǵaıtýdyń qosymsha faktory bolatyndyǵyna nazar aýdardy.
