QMG BÓ 2010 jyldyń birinshi jartyjyldyǵynda 6 283 myń tonna munaı óndirdi
ASTANA. Shildeniń 28-i. QazAqparat - «QazMunaıGaz» Barlaý Óndirý» AQ aldyn ala málimetter boıynsha aǵymdaǵy jyldyń alǵashqy alty aıynda «Qazgermunaı»,
«SSEL» jáne «PetroQazaqstan Ink.» kompanııalaryndaǵy úlesterin esepke alǵanda, 6 283 myń tonna (kúnine 257 myń barrel) munaı óndirdi. Bul aqparatty atalǵan kompanııanyń baspasóz qyzmeti taratyp otyr.
Vedomstvonyń atap ótýinshe, bul kórsetkish 2009 jyldyń sáıkes kezeńimen salystyrǵanda 610 myń tonnaǵa nemese 11 paıyzǵa artyq. Munaı óndirýdiń artýy negizinen, «PetroQazaqstan Ink.» kompanııasynyń 733 myń tonna munaı óndirýi esebinen bolyp otyr.
«Ózenmunaıgaz» jáne «Embimunaıgaz» óndiristik fılıaldary 2010 jyldyń birinshi jartyjyldyǵynda 4 316 myń tonna (kúnine 175 myń barrel) óndirgen, bul 2009 jyldyń sáıkes kezeńimen salystyrǵanda 107 myń tonnaǵa nemese 2 paıyzǵa kem. Óndirýdiń azaıýy aǵymdaǵy jyly naýryzdyń 4-i men 18-i aralyǵynda «Ózenmunaıgaz» óndiristik fılıalynda narazylyq aktsııasy oryn alyp, birqatar jumysshylardyń aýysymǵa shyǵýdan bas tartqan kezinde uńǵymalar qoryna qyzmet kórsetý rejiminiń buzylýy jáne munaı qondyrǵylaryna der ýaqytynda jóndeý jumystarynyń júrgizilmeýine baılanysty boldy.
«Qazgermunaı», «SSEL» jáne «PetroQazaqstan Ink.» kompanııalarynyń óndirýindegi QMG BÓ úlesi 2010 jyldyń birinshi jartyjyldyǵynda 1 967 myń tonnany (kúnine 81 myń barrel) qurady.
Aldyn ala málimetterge sáıkes atalǵan úsh kompanııa óndirgen munaıdy esepke almaǵanda, birinshi jartyjyldyqta 4 310 myń tonna munaı (táýligine 175 myń barrel) satyldy, onyń ishinde 3 459 myń tonna munaı (táýligine 141 myń barrel) syrtqa shyǵaryldy.
«Qazgermunaı», «SSEL» jáne «PetroQazaqstan Ink.» kompanııalarynyń satý kólemindegi QMG BÓ úlesi syrtqa shyǵarylǵan 1 686 myń tonna munaıdy (táýligine 70 myń barrel) esepke alǵanda, 2 306 myń tonnany (táýligine 96 myń barrel) qurady.
