QMG basshysy jańadan iri ken ornyn ıgerýge qatysty túsinik berdi
ASTANA. KAZINFORM — «QazMunaıGaz» UK AQ basqarma tóraǵasy Ashat Hasenov aldaǵy iske asatyn iri ken ornyna qatysty túsinik berdi.
— «QazMunaıGaz» geologııalyq barlaýdyń úlken baǵdarlamasyn qabyldady. 2026-2030 jyldary aýqymdy is-sharalar josparlanǵan. Osy rette 26 uńǵymany burǵylaý qarastyrylǵan. Birqatar ýchaskede seısmıkalyq barlaý qamtylady, onyń arasynda Jylyoı ýchaskesi de bar, — dedi Ashat Hasenov «Samuryq-Qazyna» qory Qoǵamdyq keńesiniń otyrysynan keıin tilshiler suraǵyna jaýap bere otyryp.
Onyń aıtýynsha, Qaraton jobasy boıynsha QMG-de seriktes bar. Osy oraıda bir uńǵyma burǵylandy. Bul jobaǵa qarajat seriktes esebinen óteledi.
— Jylyoı jobasy da osy sharttar negizinde júrgiziledi, óıtkeni onda da seriktesimiz bar. Al Tajyǵalı jobasyna toqtalsaq, QMG ony ózi iske asyrady, — dedi Ashat Hasenov.
Sonymen qatar ol geologııalyq barlaý jumystarynyń táýekeli joǵary ekenin eske saldy.
— 10 uńǵymanyń tek úsheýi ǵana sátti bolady, ıaǵnı qalǵany 70 paıyzynda táýekeli joǵary. Biraq bir uńǵymadan munaı tapsaq, osynyń ózi barlyq shyǵyndy qaıtarady, — dedi QMG basshysy.
Eske salsaq, buǵan Qazaqstanda Qashaǵannan kem kem emes ken orny paıda bolýy múmkin ekeni aıtyldy.
Geologııalyq barlaý jumystarynyń negizgi baǵyty Qaraton, Tajyǵalı jáne Jylyoı ýchaskelerin qamtıtyn Jylyoı karbonatty platformasy bolyp otyr.
