QMG basshysy Rýmynııanyń Premer-Mınıstrimen energetıka sektoryndaǵy yntymaqtastyq perspektıvalaryn talqylady
ASTANA. KAZINFORM – «QazMunaıGaz» UK AQ Basqarma tóraǵasy Ashat Hasenov Býharest qalasynda Rýmynııanyń Premer-Mınıstri Marchel Cholakýmen kezdesti.
Taraptar Rýmynııadaǵy QMG-nyń enshiles uıymy — KMG International N.V. (Rompetrol) qyzmetin eskere otyryp, Qazaqstan-Rýmynııanyń ekonomıkalyq yntymaqtastyǵyn nyǵaıtýdyń mańyzyn rastady.
KMGI — salyq tóleıtin jetekshi bes kompanııa qatarynda, sondaı-aq iri jumys berýshilerdiń biri.
Jalpy, halyqaralyq energetıka naryǵyndaǵy qazirgi syn-qaterlerge qaramastan, Qazaqstan energetıkalyq qaýipsizdikti qamtamasyz etýge yqpal ete otyryp, Rýmynııanyń munaı ónimderiniń basty shyǵarýshysy ári senimdi seriktesi bolyp qala beredi.
— Rýmynııa — Eýropalyq odaqtaǵy mańyzdy seriktesimiz. Buǵan munaıdy edáýir jetkizý kólemderi men QMG-nyń eldegi munaı óńdeý salasyndaǵy úlesi dálel bolyp otyr. Zaýyt jumysyn bastaǵannan beri munaı óńdeý qýaty jylyna 5,5 mln tonnaǵa ulǵaıdy. Munaı óńdeý zaýyty óńirdegi eń zamanaýı kásiporyn, jeńil munaı ónimderin shyǵarý deńgeıi 88%-ǵa jetti, - dedi A.Hasenov.
Kezdesýde ınvestıtsııalyq klımat, sondaı-aq Rýmynııadaǵy QazMunaıGaz aktıvteriniń turaqty ári senimdi jumysyn qamtamasyz etý máseleleri talqylandy.
Sol kúni QMG basshysy Rýmynııanyń Energetıka mınıstri Sebastıan Býrdýjamen kezdesti. Taraptar munaı-gaz salasyndaǵy aldaǵy yntymaqtastyq múmkindikterin talqylady.