QMG basshysy ExxonMobil-men birlesken kompanııa qurý jónindegi aqparatty rastamady
ASTANA. KAZINFORM — «QazMunaıGaz» UK AQ basqarma tóraǵasy Ashat Hasenov Qashaǵannyń batys bóligin ıgerý úshin ExxonMobil kompanııasymen birlesken kompanııa qurý jónindegi aqparatty joqqa shyǵardy.
Aıta keteıik, buǵan deıin BAQ-ta ExxonMobil men QMG Qashaǵannyń batys bóligin ıgerý úshin 50/50 úlesimen birlesken kásiporyn qurylatyny habarlanǵan edi.
- Bul aqparat shyndyqqa janaspaıdy. Bul jańalyqty oqyp shyqtym. «QazMunaıGaz» tarapynan Bloomberg-te jazylǵan málimetti rastamaımyn, - dedi Ashat Hasenov «Samuryq-Qazyna» qory Qoǵamdyq keńesiniń otyrysynan keıin tilshiler suraǵyna jaýap bere otyryp.
Onyń aıtýynsha, ExxonMobil kompanııasy QMG-nyń kópten bergi senimdi seriktesi. Ulttyq kompanııa onymen tehnologııalardy damytý jóninde birqatar kelisimge qol qoıǵan. Degenmen, sheteldik BAQ-taǵy ken ornyn ıgerý boıynsha derekter rastalmady.
Eske salsaq, jaqynda Premer-mınıstr Oljas Bektenov ExxonMobil Upstream kompanııasynyń prezıdenti Den Ammanmen kezdesti. Onda yntymaqtastyqtyń ózekti máseleleri jáne munaı-gaz salasyndaǵy birlesken jobalardy júzege asyrý barysy, sondaı-aq ınvestıtsııalyq ózara is-qımyldy keńeıtý perspektıvalary talqylandy.
