Kimderge tegin zań kómegi kórsetiledi – zańger túsindirdi
ALMATY. KAZINFORM - Almatyda Ádilet organdary qyzmetkerleri kúnine oraı ótken jıynda sotta ókildik etý, zańgerdiń keńesi men advokattyń kómegin kimder tegin ala alatyny aıtyldy.
Óńirlik kommýnıkatsııalar qyzmetinde Quqyqtyq túsindirý jumysy men zań qyzmetin kórsetý bóliminiń basshysy Aıgúl Baqtymbetovanyń sózinshe, azamattarǵa tabys deńgeıi men áleýmettik jaǵdaıyna qaramastan óz quqyǵyn qorǵaýǵa múmkindik beretin jaǵdaı jasalǵan.
- Konstıtýtsııa árkimge bilikti zań kómegin alýǵa, zańda kózdelgen jaǵdaılarda zań kómegin tegin alýǵa quqyq beredi. Memleket kepildik bergen zań kómegi júıesi az qamtylǵan jáne áleýmettik osal toptardyń quqyǵyn, bostandyǵy men zańdy múddesin qorǵaýǵa, sondaı-aq sot tóreligine qoljetimdilikti qamtamasyz etýge baǵyttalǵan. Bul saladaǵy negizgi normatıvtik akt – „Advokattyq qyzmet pen zań kómegi týraly“ Qazaqstan Respýblıkasynyń Zańy», – dedi Aıgúl Baqtymbetova.
Zań kómeginiń eń qoljetimdi túri – quqyqtyq aqparat berý. Zańnama týraly jalpy aqparatty barlyq jeke jáne zańdy tulǵalar esh shekteýsiz ala alady. Bul zań normasyn túsindirý, belgili bir jaǵdaıda qandaı áreket jasaý keregi týraly aqparat berip, quqyqtyq materıaldy jarııalaýdy qamtıdy.
Al quqyqtyq keńes bir máselege qatysty neǵurlym jan-jaqty kómek kórsetýdi kózdeıdi. Keńes aýyzsha nemese jazbasha túrde berilýi múmkin. Alaıda mundaı kómekti zań boıynsha oǵan quqyǵy bar azamattarǵa ǵana kórsetedi.
Memleket kepildik bergen kómektiń taǵy bir túri – qorǵaý men ókildik etý. Advokattar sotqa deıingi tergep-tekserýge, qylmystyq, azamattyq jáne ákimshilik protseske qatysa alady, sondaı-aq azamattardyń memlekettik organdaǵy múddesin bildiredi.
Tegin konsýltatsııa, qorǵaý men ókildik etý kómegin kim ala alady:
* ataýly áleýmettik kómek alýǵa quqyǵy bar az qamtylǵan azamattar,
* Ekinshi dúnıejúzilis soǵys ardagerleri men olarǵa teńestirilgen adamdar,
* múgedektigi bar adamdar,
* jetim balalar men ata-anasynyń qamqorlyǵynsyz qalǵan balalar ala alady.
Mundaı kómek turmystyq zorlyq-zombylyqtan, adam saýdasynan zardap shekkenderge de kórsetiledi. Keıde qylmystyq jáne azamattyq protsestik zańnamada kórsetilgen azamattardyń basqa da sanaty bul quqyqqa ıe.
Almaty qalalyq advokattar alqasy prezıdıýmy tóraǵasynyń orynbasary Gúlnar Baıǵazına mundaı kómekti naqty kimder kórsetetinin túsindirdi.
- Tegin zań kómegin kórsetý kásibı zań qoǵamdastyǵyna júktelgen. Advokattar azamattarǵa konsýltatsııa beredi, olardy qorǵap, sottarda, sondaı-aq sotqa deıingi tergep-tekserý organdarynda múddesin bildiredi. Zań keńesshileri zańda belgilengen rásim sheńberinde memleket kepildik bergen zań kómegin kórsetýge qatysady. Notarıýstar jekelegen jaǵdaıda jeńildikti sanattarǵa jatatyn azamattarǵa notarıattyq áreketti iske asyrady, – dedi maman.
Kórsetilgen kómektiń sapasy men kólemin Ádilet mınıstrligi, advokattar alqasy men zań keńesshileri palatalary baqylaıdy. Olar sondaı-aq eseptilikti jınaqtap, qalyptastyrady. Júıeni odan ári damytýdyń negizgi baǵytynyń biri – tsıfrlandyrý. Azamattarǵa zań kómegin onlaın formatta qoljetimdi etý, al mamandardyń jumysyn barynsha ashyq etý josparlanyp otyr.
Eske salsaq, Astanada turǵyndarǵa tegin zańgerlik kómek kórsetilgen edi.
