Kimde qandaı páter, keme, ushaq bary tizilip tur – Mınıstr sán-saltanat salyǵy týraly
ASTANA. KAZINFORM – Sán-saltanat salyǵyn esepteýdiń ózindik metodıkasy bar. Ol týraly tolyǵyraq Premer-Mınıstrdiń orynbasary – Ulttyq ekonomıka mınıstri Serik Jumanǵarın Kazinform agenttiginiń BIZDIÑ ORTA podkastynda aıtyp berdi.
— Salyqtyq moral degen bar, onyń máni — baı adam kóbirek tóleý kerek. Ol —aksıoma emes, múmkindigiń bolsa kóbirek tólegen jón. Sondyqtan alǵan dúnıe 450 mln teńgeden astam bolsa, onda sán-saltanat salyǵyn tóleıdi. Negizi onyń esebi kúrdeli. Salyq baǵalaýǵa baılanysty, óıtkeni naryqtyń baǵasy men resmı baǵanyń aıyrmashylyǵy eskeriledi. Esepteýdiń óz metodıkasy bar, obektiniń baǵasy 450 mln teńgeden astam bolsa, onda jylyna 3 mln teńgege jýyq bazalyq salyq, oǵan qosymsha taǵy 2% tóleısiń. Al avtokólik boıynsha 75 mln teńgeniń ústinde bolsa, salyq qarastyrylady, - dedi Serik Jumanǵarın suhbat barysynda.
Sonymen qatar vıtse-premer qymbat keme, ushaq, temeki jáne alkogol ónimderine 10% aktsız tóleý kózdelgenin málim etti.
— Birden aıtyp keteıin, bul — kóp aqsha emes. Qazir bizde kimde qandaı páter bar, qandaı kemesi jáne ushaǵy bary týraly tizim bar. Sondyqtan qatty áser etpeıdi, bul — qaǵıda, - deıdi mınıstr.
Aıta keteıik, 9 sáýirde Májilis Salyq kodeksiniń jańa jobasyn birinshi oqylymda maquldady.
Salyq kodeksiniń jańa jobasy boıynsha salyq esebin tapsyratyndar sany 30 paıyzǵa qysqarady.
Eske salsaq, qosylǵan qun salyǵy salynatyn aınalymnyń tómengi shegi 40 mln teńge bolady.
Sondaı-aq Serik Jumanǵarın korporatıvtik tabys salyǵynyń mólsherlemesi ósetin salalardy atady.