QMDB: Ulyq mereke - Qurban aıtty joǵary deńgeıde ótkizý sharalary pysyqtaldy
ASTANA. 15 qazan. QazAqparat - Qazaqstan musylmandary dinı basqarmasynyń tóraǵasy, Bas múftı, sheıh Ábsattar qajy Derbisáli hazrettiń qatysýymen kezekti tóralqa májilisi ótti,
dep habarlady QMDB-nyń baspasóz qyzmeti.
QMDB-nyń aımaqtaǵy ókil ımamdary bas qosqan jıynda ulyq mereke - Qurban aıtty joǵary deńgeıde ótkizý is-sharalary pysyqtaldy. Dinbasy ókil ımamdarǵa mereke kúni meshit aýlasyna, ashanasyna arnaıy dastarhan jaıyp, kelgen qonaqtarǵa qurmet kórsetýdi, rýhanı kesh uıymdastyrýdy, turmysy tómen otbasylarǵa qurbandyq etin taratýdy, buqaralyq aqparat quraldary jetekshilerine, zııaly qaýym ókilderine, memlekettik mekeme basshylaryna Qurban aıtpen quttyqtaý hattaryn jiberýdi, aıt qarsańynda arnaıy baspasóz máslıhatyn ótkizýdi tapsyrdy.
Basqosýda sóz alǵan QR Din isteri agenttigi tóraǵasynyń orynbasary Marat Ázilhanov meshitterdi qaıta tirkeý jumysynda belsendilik tanytqan ǵıbadathana qyzmetkerlerine rızashylyq bildirdi.
Tóralqada «Zeket» qorynyń jumysyn júıeli júrgizý, meshit-medreselerdegi dinı saýat ashý sabaqtaryn jandandyrý, asyl din - Islam nasıhatyn kúsheıtý, t.b. máseleler sóz boldy. Bas múftı ýaǵyz-nasıhat jumystary boıynsha jaqsy nátıjege qol jetkizgen keıbir oblys ımamdaryna alǵys aıtty.
