QMDB tóraǵasy Dúnıejúzi qazaqtarynyń IV quryltaıyna kelgen delegattar men elorda turǵyndaryna ýaǵyz aıtty
ASTANA. 27 mamyr. QazAqparat /Gúlmıra Álıakparova/ - Búgin, qasıetti juma kúni Qazaqstan musylmandary Dinı basqarmasynyń tóraǵasy Ábsattar qajy Derbisáli «Nur Astana» ortalyq meshitinde juma namazyna qatysyp, kópshilik jamaǵatqa ýaǵyz aıtty.
Ortalyq meshitiniń naıb ımamy Tólebı Ospannyń aıtýynsha, QMDB-nyń basshysy Á.Derbisáli Dúnıejúzi qazaqtarynyń IV quryltaıyna kelgen delegattar men elorda turǵyndarynyń aldynda táýbe qasıetteri taqyrybynda ýaǵyzdardy molynan aıtty.
Táýbe ár pendeniń ózi jasaǵan kúnálaryna shyn júrekten ókinýi, kúıinýi degendi bildiretin kúlli musylman qaýymyna ortaq arab sózi. Árıne, kúnásiz pende kemde-kem. Sebebi, Alla taǵala Adamdy (a.s) jaratqan kezde, onyń topyraǵyna jamandyq pen jaqsylyqty qosa ılegen degen sóz bar. Al, jırenishti tirlikterden jáne jaman ádetterden arylý tek qana eki ottyń birimen: ıaǵnı bul fánıde bilip-bilmeı istegen qateligine ishteı, shyn júrekten qatty ókinip, Allaǵa jalbarynýmen nemese aqyrettegi tozaq otymen ǵana bolady. Sondyqtan, aqyret azabynan qutylýdy oılaǵan árbir múminniń bu dúnıede táýbe etkeni abzal.
Osyny atap ótken Bas múftı, ıslamda árbir múmin musylman úshin táýbe etý ýájip ekendigi týrasyndaǵy aıat-hadısterden mysaldar keltirdi.
Dinbasy jamaǵatpen birge juma namazyna qatysyp, namaz sońynda ıgi bata jasady. Onymen kópten beri qaýyshpaǵan kópshilik shynaıy alǵystaryn bildirip jatty.
