QMDB tasqynnan zardap shekken Túrkistan oblysynyń halqyna kómek qolyn sozýda

NUR-SULTAN. QazAqparat – Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly QMDB tasqynnan zardap shekken ońtústiktegi halyqqa kómek kórsetiletinin málim etti, dep habarlaıdy QazAqparat tilshisi.

«Bıyl qasıetti Ramazan aıynyń karantın jaǵdaıynda ótip jatqanyn ózderińiz kórip otyrsyzdar. Bul jaǵdaı saýapty amaldar men ıgi sharalarǵa kedergi keltirmedi. Meshit tarapynan 100 myńǵa jýyq kómekke muqtaj otbasyǵa qaıyrymdylyq jasaldy. Aýyzashar asy áli kúnge deıin tegin taratylýda. Saýaptar eselenip jazylatyn berekeli aıda ıgi iske atsalysqan barsha azamatqa aıryqsha alǵysymdy bildiremin. Alla razy bolsyn!» - dedi Bas múftı OKQ-da ótken baspasóz máslıhatynda.

Naýryzbaı qajy Taǵanuly «Qaıyrymdylyq jasasań – qaıyryn óziń kóresiń» dep halqymyz aıtqandaı, ıgi amaldyń saýaby eselinýin tiledi.

«Biz osynaý ıgi jumystarmen shektelmeı, Maqtaaral aýdanyndaǵy jerlesterimizge ár oblystaǵy meshitterdiń qoldaýymen azyq-túlik tıelgen júk kólikterin jiberdik. Qarjylaı da qoldaý kórsettik. Biz búgin «Zeket» qorynyń uıymdastyrýymen, oblystaǵy meshitterdiń atsalysýymen 10 mıllıon teńge qarjylaı kómekti «Túrkistan korporatıvtik áleýmettik damý qoryna» aýdardyq. Sonymen qatar 30 tonna un jetkizetin bolamyz. Alla qalasa, 18 mamyrda Maqtaaral aýdanyndaǵy baspanaǵa asa zárý eki otbasyǵa eki úıdiń kiltin tabystaımyz. «Zeket» qorynyń «El úlesi – páterge» jobasy aıasynda júzege asatyn qaıyrymdylyq sharasyna, Alla buıyrsa ózim de qatysamyn. Sondaı-aq Tólebı aýdanyndaǵy tasqyn sýdan zardap shekken jerlesterimizge de qaıyrymdylyq kómek berýdi josparlap qoıdyq», - dedi ol.

Bas múftı tótenshe jaǵdaı kezinde Qazaqstan musylmandary dinı basqarmasynyń qabyldaǵan sheshimine túsinistik tanytyp, orazany oqshaý túrde ótkizip, úıde qulshylyq etip jatqan barshańyzǵa óz atymnan taǵy da alǵysyn jetkizdi.