QMDB-nyń janaıqaıymen Astanada súıisýden jarys bolmaıtyn boldy
ASTANA. 11 shilde. QazAqparat - 9 shilde kúni Qazaqstan musylmandary dinı basqarmasy Astanada jastar arasynda súıisýden ótetin jarysqa qatysty málimdeme jasaǵan bolatyn.
«Ǵasyrlar boıy musylman bolyp kelgen qazaq eli nebir zulmattardan aman ótip, jańa zamanǵa aıaq tirep, eńsesin tiktep, ımandy ómirge bet bura bastaǵanda, «jer astynan jik shyqty, eki qulaǵy tik shyqty». Saryarqanyń tósinde, dálirek aıtqanda, ásem qala Astanada jastar arasynda soraqy saıys ótkizý týraly «bastama» esti jurtty eleń etkizdi hám ult pen din janashyrlarynyń narazylyǵyn týdyrdy. Oǵan 13 shilde kúni ótetin saıysta Astana jastarynyń ardan bezýi sebep bolmaq», - delingen bolatyn málimdemede.
Eske salsaq, 2010 jyldyń 25 jeltoqsanynda súıisýden jarysty uıymdastyrmaqshy top «Nur Astana» meshiti janyndaǵy «ASIA PARK» saýda úıinde tyrdaı jalańash jastar jarysyn ótkizgen bolatyn. Endi eki kún boıy (48 saǵat) buǵanasy bekimegen, rýhanı dińgegi qatpaǵan jastardy uzaq súıisýden jarystyrmaq boldy.
«Jastardy jalańashtaý da, súıistirý de - túptep kelgende ultty azǵyndyqqa salýdyń alǵashqy baspaldaqtary. Bul bizdiń eldiń ımandylyǵy men adamshylyǵyn sarapqa salary anyq. «Kúnáli ispen «Gınnes» kitabyna enemiz» degen oıdyń ózi netken qorqynyshty, ári jıirkenishti. El tórinde osyndaı soraqy isti boldyrmaýǵa barshamyz jaýaptymyz. Sondyqtan «arym - janymnyń sadaǵysy» dep ótken arda qazaqtyń búgingi urpaqtary bul iske beı-jaı qaramaıdy degen senimdemiz», - dep jazdy QMDB ókilderi.
Búgin tańerteń QMDB kezekti aqparat taratyp, onda soraqy saıys toqtatylǵandyǵyn aıtty.
«QMDB málimdemesin elimizdiń tilimiz ben dinimizge janashyr saıttary, baspasóz quraldary jarııalaǵanyn aıtý kerek. Qoǵam qaıratkerleriniń, BAQ ókilderiniń, din qyzmetkerleriniń janaıqaıy báleli iske bastamashyl bolǵandardyń qulaǵyna jetse kerek. Saıys bolmaıtyn boldy. Allaǵa sansyz shúkir!», - delingen baspasóz habarlamasynda.
