QMDB-nyń www.fatua.kz saıtynan 10 myńnan astam suraqtyń jaýabyn tabýǵa bolady
ASTANA. QazAqparat Búgin Astanada ótip jatqan Qazaqstan musylmandary dinı basqarmasynyń qasıetti Ramazan aıyna arnalǵan Tóralqa májilisinde www.fatua.kz saıtynyń ashylý rásimi boldy.
QMDB naıb-múftıi, Áziret Sultan meshitiniń Bas ımamy Serikbaı qajy Orazdyń aıtýynsha, bul saıt biregeı baza bolyp tabylady.«Saıtta 10 myńnan astam suraqtarǵa jaýaptar berilgen jáne búgingi tańda 40-tan astam sapaly, ómirsheń, búgingi tańdaǵy túrli jaǵdaılarǵa baılanysty patýalar bar», - dep atap ótti ol. Sonymen qatar, naıb-múftıdiń aıtýynsha, eki jyl buryn QMDB-da aqparattyq-nasıhattyq top qurylǵan. «Sonyń nátıjesinde bul top respýblıkalyq jáne jergilikti deńgeıde aqparattyq-nasıhattyq jumys júrgizip keledi. Respýblıkalyq aqparattyq-nasıhat tobynda 30-ǵa tarta joǵary bilikti teolog mamandar men ǵylymı dárejeleri bar azamattarymyz jumys isteıdi. Al jergilikti aqparattyq-nasıhattyq toptarymyzda oblystyq, aýdandyq, aýyldyq ımamdarymyzdan quralǵan ujym bar. Olardyń júrgizgen jumystarynyń nátıjesinde elimizdegi 1,5 mıllıonnan astam otandastarymyz asyl dinimiz týraly jan-jaqty aqparattandyryldy. Mundaǵy basty másele ekstremızm, lańkestik jáne teris aǵymdardan saq bolý jónindegi ýaǵyzdardy taratý», - dep túsindirdi S. Oraz.
