QMDB-nyń ruqsatynsyz endi eshkim shetelge dinı oqýǵa bara almaıdy
ASTANA. QazAqparat - Budan bylaı shetelge dinı oqýǵa baratyndar Qazaqstan musylmandary dinı basqarmasynan arnaıy ruqsat qaǵaz alýy shart. El azamattary qajetti qujatty alǵan jaǵdaıda ǵana jiberiledi. Bas múftı Erjan qajy Malǵajyulynyń Mysyrǵa jasaǵan saparynda osyndaı kelisimshartqa qol qoıyldy.Bul týraly QMDB baspasóz qyzmetinen habarlady.
Erjan qajy Maıamerov Mysyr múftıi sheıh Shaýqı Ibrahımmen kezdesýinde din mamandarynyń bilimi men biliktiligi týraly usynys-pikirimen bólisti. Ekijaqty kezdesýde din qaıratkerleri ózara kelisim men yntymaqtastyq týraly kelisimshart qujatyna qol qoıdy. Atalǵan qujatta otandastarymyz tek Qazaqstan musylmandary dinı basqarmasynan arnaıy ruqsat qaǵaz alǵan jaǵdaıda ǵana Mysyrda dinı ilim alýyna múmkindik beriletini aıqyn kórsetilgen. «Ál-Azhar ýnıversıtetine Qazaqstan azamattary tek QMDB-nyń jazbasha kelisimi jáne ony Qazaqstan Respýblıkasynyń Mysyr Arab Respýblıkasyndaǵy Elshiliginiń kýálandyrýy arqyly qabyldanady», - delingen Qazaqstan musylmandary dinı basqarmasy men Ál-Azhar ýnıversıteti arasyndaǵy bilim, ǵylymı jáne mádenı yntymaqtastyq týraly kelisim qujatynda.
