QMDB meshitte balalarǵa aıaǵyn ýqalatqan ımamǵa eskertý jasady

ASTANA. KAZINFORM — Túrkistan oblysynda meshitte balalarǵa aıaǵyn ýqalatqan ımam kópshiliktiń ashýyn keltirgen edi. Búgin QMDB atalǵan oqıǵaǵa qatysty málimdeme jasady.

Dinı basqarmanyń baspasóz hatshysy Aǵabek Qonarbaıuly Facebook-tegi paraqshasynda málimdemeni jarııalap, qulshylyq úıine kelgen adam meshit ádebin saqtaýy tıis ekenin atap ótti.

— Meshit — qulshylyq úıi, jamaǵat jınalatyn rýhanı orda, qasıetti meken, tárbıe orny. Qulshylyq úıine kelgen adam meshit ádebin saqtaýy tıis. Bul — musylmannyń kórkem mineziniń bir.Túrkistan oblysy Saryaǵash aýdanyndaǵy meshitte bolǵan oqıǵa áleýmettik jelilerde tarap, qoǵamnyń túrli pikir qaıshylyǵyn týdyrdy. Osyǵan oraı Qazaqstan musylmandary dinı basqarmasy qasıetti orynda qoǵam narazylyǵyn týdyrǵan áreketke jol bergeni úshin meshit ımamyna eskertý jasady. Qazaqstan musylmandary dinı basqarmasy elimizdegi barsha musylman jamaǵatyn qulshylyq úılerinde daýys kóterip sóılemeýge, ádepsiz áreketterge jol bermeýge, urys-keris jasamaýǵa shaqyrady. Jamaǵatty barynsha meshit ádebin saqtaýǵa úndeımiz, — dep jazdy ol.

Eske salsaq, atalǵan oqıǵa Saryaǵash aýdanyndaǵy meshitte bolǵan. Onda ýaǵyz aıtyp otyrǵan aqsaqaldyń aıaǵyn 3 bala ýqalap otyrǵanyn kórýge bolady. Jarııalymǵa pikir bildirýshilerdiń basym bóligi meshitke kelgen balalarǵa beıádep tirlik jasatqan qarııany kinálaýda.