QMDB mekteptegi kıim úlgisine qatysty ustanymyn jarııalady
ASTANA. QazAqparat - Qazaqstan musylmandary dinı basqarmasyna musylman jamaǵaty jáne ata-analar tarapynan mektep formasyna qatysty saýaldar túsýde. Respýblıkamyzdyń ár óńirindegi musylmandardyń birqatar ótinish-tilekterine oraı, tómende atalǵan máselege qatysty QMDB ustanymyn jarııalady.
«Islam dini musylman er men áıelderge áýretin jaýyp, sharıǵat ádebi boıynsha kıinýdi mindettegen. Úıden tys, qoǵamdyq oryndarda uzyn etek-jeńdi kıim kıip, oramal tartý musylman áıeldiń ary men abyroıyn saqtaıdy.
Qasıetti Quranda Alla Taǵala: «Ýa, Paıǵambar! Jubaılaryńa, qyzdaryńa jáne ıman keltirgenderdiń áıelderine aıt: ústerine jaýlyqtaryn jamylsyn...»(«Ahzap» súresi, 59-aıat) dep buıyrǵan.
Aıatta kıimniń túsi nemese úlgisi anyq aıtylmaǵan. Sondyqtan ár ult, ár mádenıet ókilderi Allanyń ámirin óz ustanymdary, tarıhı tanym-túsinikteri boıynsha oryndaıdy.
Qazaqstan musylmandary dinı basqarmasy elimizdegi musylman qyz-kelinshekter men áıelderdi kıim kııý úlgisinde qazaq halqynyń salt-dástúrlerin saqtaı otyryp, jınaqy kıinýge keńes beredi. Kózge ersi kórinetin, dene bitimin aıqyndaıtyn, qara tústi kıim-keshekterdi paıdalanbaǵan durys. Al paranja (nıqab) kııý - saltymyzda bolmaǵan. Bul ata-babalarymyzdyń ustanǵan joly emes.
Biz musylman jamaǵaty men ata-analardy oqý oryndarynyń mektep oqýshylarynyń kıim úlgisine qatysty qoıylatyn talaptaryna túsinistikpen jáne sabyrlyqpen qaraýǵa shaqyramyz. Bul máseleni ýshyqtyrý durys emes. Óıtkeni elimizde oramalǵa túbegeıli tyıym salynbaǵanyn túsinýimiz kerek. Tek orta mektepterde kıim úlgisin birizdilikke túsirý maqsatynda sheshim qabyldanǵan.
Konstıtýtsııaǵa sáıkes elimiz zaıyrly memleket bolyp tabylady, onda azamattardyń ar-ojdan bostandyǵyna erkindik berilgen. Sonymen qatar, «Dinı qyzmet jáne dinı birlestikter týraly» Zańda dinı birlestikterdiń memlekettiń qyzmetine aralaspaıtyny kórsetilgen. Atalǵan Zańda elimizdegi bilim berý jáne tárbıeleý júıesi din men dinı birlestikterden bólingendigi jáne zaıyrly sıpatta bolatyndyǵy aıtylǵan.
Dindar azamattar qoǵamnan bólek ómir súrmeıdi. Dinimizdegi boıusyný - negizgi mindetterdiń biri. Sondyqtan musylmandar zańǵa qurmetpen qaraıdy.
Elimizdiń zańnamalary bizge balalarymyzdyń orta bilim alýyn qamtamasyz etýimizdi mindetteıdi. Bilimsizdik búlikke bastaıtynyn umytpaıyq. Sondyqtan qyz balanyń tolyqqandy zaıyrly bilim alýyna nazar aýdarýǵa keńes beremiz.
Dinı basqarma qyzdarymyzdyń dástúrimizge saı, uzyn etek, uzyn jeń kıim kıip, oramal tartyp, ınabatty bolyp júrýin tileıdi. Osy rette mektep ákimshilikteri men qoǵamdyq keńesterinen jergilikti mektepterde kıim úlgisin qabyldaýda musylman jamaǵatynyń tilegin eskerýdi suraıdy», - dep jazylǵan QMDB habarlamasynda.
