QMDB qyzmet kórsetýdiń sapasyn artyrý maqsatynda qajylyq fırma jetekshilerin mıssııaǵa múshelikke qabyldady - Mekke
MEKKE. 22 qazan. QazAqparat - Qazaqstan musylmandary dinı basqarmasy qajylarǵa qyzmet kórsetýdiń sapasyn artyrý maqsatynda bıyl qajylyq fırma jetekshilerin mıssııaǵa múshelikke qabyldady.
Bul - qajylyq kompanııa jetekshileriniń dinı basqarma jumysyn jaýapkershilikpen bólise otyryp, tıisti tapsyramalardy tyńǵylyqty atqarýyna serpin beredi, dep habarlady Qazaqstan musylmandary dinı basqarmasynyń baspasóz hatshysy Aǵabek Qonarbaıuly Mekke qalasynan.
Ústimizdegi jyly 21 qazanda Qazaqstan musylmandary dinı basqarmasynyń Apparat basshysy Balǵabek Myrzaev qajylyq mıssııasynyń shtab páterinde fırma jetekshilerimen dóńgelek ústel ótkizdi. Basqosýǵa QMDB qajylyq bóliminiń meńgerýshisi Qanat Nurmahanuly, ýaǵyz-nasıhat bóliminiń bas mamany Altynbek Utyshan qatysty. Onda qajylarǵa qyzmet kórsetýdiń sapasyn arttyrý máseleleri sóz bolyp, kompanııa ókilderi bul jaıly oılaryn ortaǵa saldy. Basqosýda Arafat, Mına, Muzdalıfa jazyqtarynda qajylyq rásimderin uıymdastyrý jumystary pysyqtaldy. Qazaqstannan kelgen jerlesterimiz jaıly tolyq aqparat almasyldy. Sondaı-aq paryzyn óteýshi otandastarymyzdy Jıdda áýejaıynan kútip alý, shyǵaryp salý sharalary áńgimege arqaý boldy. Qajylardy Mekkeden Mınaǵa, Arafat pen Muzdalıfaǵa tasymaldaýda jol qozǵalysy qaýipsizdigin qatań saqtaý sharalaryn qolǵa alý jaǵy da nazardan tys qalmady. Sonymen qatar qandaı jaǵdaı bolsyn mıssııa múshelerine eskertý qajettigi eskertildi.
«Qajylarǵa qyzmet kórsetý kezinde ártúrli jaǵdaılarǵa tap bolamyz. Sondyqtan jerlesterimizdiń jol júrý barysynda qaýipsizdigin qamtamasyz etý, densaýlyǵyn jiti qadaǵalap, der kezinde kómek kórsetý - bárimizge ortaq is. Jaýapkershilikti sezinip jumys jasaıyq», - dedi B.Myrzaev qajylyq fırma jetekshilerimen kezdesýinde.
Eske sala keteıik, qazaqstandyq qajylardy tasymaldaýmen 20 kompanııa aınalysady.
