QMDB QR azamattarynyń musylman elderinde oryn alǵan soǵysqa qatysýyna baılanysty málimdeme jasady

«Qazaqstan musylmandary dinı basqarmasynyń Tóralqa músheleri, Ǵulamalar Keńesi musylman memleketterinde oryn alǵan keleńsiz oqıǵalarǵa alańdaýshylyq bildiredi jáne turaqsyzdyqty, dinı janjal men alaýyzdyqty órkenıetti túrde, beıbit jolmen sheshýge shaqyrady.

Jer betinde Islam halıfatyn ornatamyz degen uranmen birqatar memleketterden jınalǵan qarýly toptar Irak jáne Sham elderinde adasqan armannyń, qury qııaldyń jeteginde júrip, dinı dúrdarazdyq pen búlik týdyrýda. Olardyń qataryna qosylǵan maqsaty aıqyn emes, dindi bilimmen emes, sezimmen túsingen, qarý alyp, jıhadqa shyqqan Qazaqstan azamattarynyń áreketin qatań aıyptaımyz.

Islam memleketin qurý ıdeıasyn taratýshylar qasıetti Qaǵbany qıratyp, jermen jeksen etý kerek degen pıǵyldaryn da ashyq aıtýda. Bul - Islamǵa qarsy áreket, musylmandyq bylaı tursyn, adamshylyqqa da jat amal. Kezinde Iemen patshasy Abraha kóp áskermen Qaǵbany qıratý nıetimen jolǵa shyqqanda, Alla Taǵala olardyń tóbelerinen qustar jiberip, tas jaýdyryp qurdymǵa batyrǵan. Osylaısha, qasıetti Qaǵbany Allanyń ózi qorǵaǵan. Bul oqıǵa «Pil» súresinde ashyq baıandalǵan. Osy súrede: «Olarǵa top-top ábábıl qustaryn jiberdi. Qustar olarǵa balshyqtan kúıdirilip jasalǵan tastar atty. Osylaısha Alla jelingen topan tárizdi qyldy», - delingen.

Búginde ǵalamtor betinde dúnıe júziniń musylmandaryn jıhadqa shaqyratyn aýdıo jáne vıdeomaterıaldar kún sanap kóbeıýde. Jýyrda býyny áli bekip úlgermegen, ońy men solyn tanymaıtyn, dindi ustanýǵa deńgeıi men qabileti jetpegen jas qazaq balalarynyń qarý kezenip, soǵysqa úndegen sózi jarııalandy. Óz sózine ózi jaýap bere almaıtyn jastaǵy oıyn balalarynyń syrtqy kúshterdiń yqpaly men arbaýynda ketýi bizdi, musylman jamaǵatyn qatty ókindiredi. Balanyń bolashaǵyn oılaǵan ata-ana buǵan áste jol bermeýi tıis edi. San ǵasyrlyq tarıhy bar salty men dástúrli dininen qol úzip, dinı ıdeologııaǵa sanasy ýlanǵan keıbir ata-analardyń qasań kózqarastary men Quranǵa jáne sharıǵatqa qaıshy, adamgershilikke jat áreketterinen balanyń da bolashaǵyna balta shabylyp, saıasılanǵan dinı ustanymnyń qurbanyna aınalýda. Jastaıynan bilim almaǵan, ata-áje, ata-ananyń tárbıesin kórmegen, mektep muǵalimniń táliminen sýsyndamaǵan jetkinshek qoǵamǵa qaıtip paıdasyn tıgizbek?

Qazaqstan musylmandary dinı basqarmasy óziniń ýaǵyz-nasıhat jumystarynda jastardy dindar bolyp ketýge nemese ásire dinshildikti ustanýǵa shaqyrmaıdy. Otanyn súıetin, ata-anasyn qadirleıtin, memleketshil azamat bolyp ósýge úndeıdi.

Musylman adam dindi saıasat úshin paıdalanǵysy keletinderdiń, Islamdy mansuqtaýdy maqsat tutqan saıası kúshterdiń ıdeologııasynan saqtanýy tıis. Paıǵambarymyz Muhammed (Allanyń oǵan ıgiligi men sálemi bolsyn) hadısteriniń birinde: «Musylmandy sógý - pasyqtyq, al ony óltirý - kúpirlik», - degen.

Teris pıǵyldy radıkaldy aǵymdar Islamdaǵy jıhad sózin paıdalanyp, adamdardy musylman elderi arasynda bolyp jatqan qaqtyǵysqa qatysýǵa shaqyrýda. Osyǵan oraı, Qazaqstan musylmandary dinı basqarmasynyń Ǵulamalar Keńesi «Jıhad uǵymy jáne qazirgi zaman» týraly arnaıy pátýa shyǵardy.

Jıhadtyń sharty: eń áýeli ımamnyń (memleket basshysynyń) ruqsaty bolýy tıis. Sharıǵatymyzda ımamnyń (memleket basshysynyń) ruqsatynsyz soǵysqa shyǵýǵa tyıym salynǵan. Jıhad (soǵys) isteri ımamǵa (memleket basshysyna) júktelgeninde eshqandaı kúmán joq. Kúná isterden bólek basshyǵa boısuný mindet. Qasıetti Quranda Alla Taǵala: «Áı, múminder. Allaǵa boısunyp, Paıǵambarǵa ári ózderińnen bolǵan ámir ıelerine boısunyńdar» («Nısa» súresi, 59-aıat) dep buıyrǵan.

Ekinshiden, sharıǵat shartyna sáıkes, jıhadqa shyqqan adamnyń maqsaty aıqyn bolý, úshinshiden, dushpannan tónip turǵan qaýip naqty bolý. Eger bul sharttar oryndalmasa, onda onyń is-áreketi buzaqylyqqa, qaskóılikke ulasady. Bireýdiń ómirine qaýip tóndirýge, ar-namysyna tııýge, zulymdyq jasaýǵa - dinimizde ruqsat joq. Jaratýshy Iemiz: «...Jazyqsyz adamdy óltirgen adam - barlyq adam balasyn óltirgenmen teń (kúnákar) bolady...» («Máıda» súresi, 32-aıat) - dep qatań eskertken.

Soqyr senimmen ózge eldiń ishki máselesine aralasyp, saıası soǵystarǵa qatysý - musylmanshylyqqa jat, sharıǵatqa qaıshy. Shyndyǵynda, kez-kelgen soǵysqumar adamnyń ashqan soǵysy jıhadqa jatpaıdy. Negizinde, mundaı bas-kózsiz ozbyrlyq is-áreketter máseleni sheshpeıdi. Kerisinshe, qıyndatyp, shıelenistire túsedi. Qazirgi tańdaǵy eń úlken jıhad - saýatsyzdyqpen kúres. Paıǵambarymyz (Allanyń oǵan ıgiligi men sálemi bolsyn): Úlken jıhad - óz nápsińmen kúres», - degen.

Islam dini memlekette, qoǵamda tynyshtyq bolýyn kózdeıdi. Pendeni soǵan tárbıeleıdi. Qazaqstan musylmandary dinı basqarmasy musylman elderinde oryn alyp jatqan oqıǵalardy qoldamaıdy jáne qazaq jastarynyń ozbyrlyq áreketin aıyptaıdy.

Alla Taǵala el-jurtymyzdy búlikten saqtap, birlik-yntymaǵynan ajyratpasyn dep tileımiz», - dep jazylǵan málimdemede.