QMDB: Qajylyqqa barý qujattaryn qabyldaý 10 tamyzda aıaqtalady

Bul týraly Qazaqstan musylmandary dinı basqarmasynyń tóraǵa orynbasary, naıb múftı Serikbaı qajy Oraz qajylyq týrfırmalarymen bolǵan jıynda málimdedi.

Bıylǵy qajylyq maýsymy tamyz aıynyń 30-nan bastalyp, qyrkúıek aıynyń 22-inde aıaqtalady. Al 10 qyrkúıekte ulyq meıram Qurban aıt merekesi bastalady.

«Saýd Arabııasy Qajylyq mınıstrliginiń bekitken erejeleri boıynsha qajylyq saparyna qatysty qujattardy qabyldaý 10 tamyzda aıaqtalady. Otandastarymyzdy osy sanaýly kúnderdi sátti paıdalanýǵa keńes beremiz. Elimizde qajylyq paryzyn óteýge mol múmkindikter jasalǵan. Bul - Allanyń halqymyzǵa bergen uly syıy. Keıbir elderde musylmandar qajylyqqa barý úshin kezekke turady. Óıtkeni, bólingen kvota sany shekteýli. Tipti, kezegi kelmeı, dúnıe salatyn adamdar da bar. Al elimizde musylmandar emin-erkin kezeksiz qajylyq paryzyn ótep kelýde. Bul - Alla taǵalanyń halqymyzǵa bergen nyǵmeti», - dedi Serikbaı qajy Oraz.

Aıta ketsek, qajylyqqa barýǵa nıet bildirgen azamattar QMDB qajylyq bólimine nemese Dinı basqarma jarııalaǵan konkýrstan ótken qajylyq kompanııalaryna habarlasýyna bolady. Olar:

1. «Hıdaıat nur»;

2. «ıAssaýı»;

3. «Atlas týrızm»;

4. «Hıkmet trevel»;

5. «Delta trevel»;

6. «Qyzmet saıahat»;

7. «Ál-marýa»;

8. «Sanabl»;

9. «Ańsar krýız»;

10. «Nur-Qazaqstan».

Sonymen birge, osy kompanııalar quramynda jumys jasaıtyn «Sembekova ı K», «Káýsar saıahat», «Imantrevel», «Robınzon», «Ordabasy», «Mına týr», «TVV týr» kompanııalarynda qasıetti qajylyqqa barýdyń mol múmkindikteri qarastyrylǵan, dep habarlaıdy QMDB baspasóz qyzmetinen.