QMDB: Qaıtys bolǵan adamnyń aǵzasyn tiri adamǵa salý «amanatqa qııanat» emes

ASTANA. KAZINFORM – Qazaqstan musylmandary dinı basqarmasynyń sharıǵat jáne pátýa bóliminiń mamany Elbek Qojamuratov ortalyq kommýnıkatsııalar qyzmetinde ótken dóńgelek ústelde aǵza donorlyǵy týraly sharıǵat úkimderin túsindirdi.

- Árıne, ondaı habarlardy estip jatamyz. Adamnyń táni dinde amanat ekenin, amanatqa berilgen tándi sol kúıinde tapsyrý kerek degen sekildi sózderdi jıi aıtady. Amanat uǵymyna toqtalsaq, Islam dininde salaýatty ómir súrý – mindet. Deneń, aǵzań sol jaǵynan amanat. Al sharıǵat ruqsat bergen dúnıeler amanatqa qııanat bolyp eseptelmeıdi. ıAǵnı, tiri adamnan tiri adamǵa bolsyn, qaıtys bolaıyn dep jatqan adamnyń óz aǵzasyn kóz jumǵannan keıin basqa adamǵa salýǵa kelisim berýine sharıǵatta ruqsat bolǵandyqtan, bul amanatqa qııanat bolyp eseptelmeıdi, - dedi din ókili.

Aıtýynsha, Qazaqstan musylmandary dinı basqarmasynyń janyndaǵy ǵulamalar keńesi bul másele týraly birneshe jyl buryn pátýa shyǵaryp tastaǵan.

- Bul dinı resmı qujat bolyp esepteledi. Osy pátýada álemniń beldi pátýa beretin mekemeleriniń tájirıbeleri, ǵalymdardyń pikirleri eskerilgen. «Ózindik sharttarymen tiri adamnan tiri adamǵa da, qaıtys bolǵan adamnan tiri adamǵa da aǵza aýystyrýǵa bolady, - degen pátýa shyqty. Bul – dinimizdiń quran-súnnetterine, ǵalymdarymyzdyń pikirine negizdelgen qujat. Sondyqtan din jaǵynan másele bolmaý kerek dep esepteımiz. Degenmen keıbir adamdardyń oǵan daıyn bolmaýy, jeke nanymdary sheshim qabyldaýǵa kedergi bolýy múmkin, - dedi Elbek Qojamuratov.

Buǵan deıin Nazgúl Jangeldına elimizde 10 myń adam ǵana donor bolýǵa keliskenin málimdegen edi.