QMDB-ǵa qarasty saıt ákimshileri bas qosty
ASTANA. 15 qarasha. QazAqparat - Keshe el musylmandarynyń qarashańyraǵy - Qazaqstan musylmandary dinı basqarmasynda aımaqtaǵy saıttarymyzdyń ákimshileriniń qatysýymen alqaly jıyn ótti. Basqosýǵa Bas múftı Erjan qajy Malǵajyuly qatysyp, ınternetti el ıgiligine, musylmandardyń aýyzbirshiligi men ýaǵyz-nasıhat jolynda barynsha paıdalaný qajettigine toqtaldy.
«HHІ ǵasyr - aqparattyń zamany. Qazir elimiz aqparatpen azyqtanyp, jastarymyz bilimdi de ınternetten alýda. Sondyqtan biz osy rette ınternet, saıt arqyly halqymyzdyń rýhanı damýy men Islam qundylyqtarymen sýsyndaýyna barynsha úles qosýymyz kerek. Qazaqta: «Otyz tisten shyqqan sóz otyz rýly elge taraıdy» degen sóz bar. Sondyqtan ǵalamtorda shyqqan árbir aqparatqa, árbir maqala men ýaǵyzǵa mán berýimiz qajet. Jumystaryńyzǵa bereke tileımin. Allanyń dinine aıanbaı qyzmet ete berińizder. Al meniń tarapymnan qandaı da qoldaý qajet bolsa, men árqashan daıynmyn», - dedi Bas múftı.
QMDB Ýaǵyz nasıhat jáne ınternetpen jumys bóliminiń meńgerýshisi Ershat Ońǵarov áriptesterine www.muftyat.kz-tiń jańa dızaınymen tanystyryp, olardy ortaq iste jumyla qyzmet etýge shaqyrdy jáne saıttyń aldaǵy jumys josparlarymen tanystyrdy. Sonymen qatar, saıt ákimshileri ǵalamtordaǵy keıbir máseleler jaıly pikir almasty. Al, elimizdegi 2013 jyldyń úzdik blogshysy - Nurlan Janaı áriptesterine trenıng ótkizdi, dep jazady muslim.kz.
