QMDB dámhana ıelerin halyqqa qoljetimdi aýyzashar mázirin usynýǵa shaqyrdy

ASTANA. KAZINFORM — Qazaqstan musylmandary dinı basqarmasy qasıetti aıda aýyzashar ótkizý ádebine qatysty málimdeme jasady.

Basqarma atap ótkendeı, qasıetti Ramazan — musylman balasyn rýhanı tárbıelep, qarapaıymdylyq pen kishipeıildikke baýlyp, dáýletti men muqtajdyń arasyn jaqyndastyra túsetin aı. Bul aıda jasalatyn árbir jaqsylyqtyń saýaby eselenedi. Sondaı-aq muqtajǵa qol ushyn berý — úlken saýapty is. 

— Sol saýapty istiń biri — aýzy berik janǵa aýyzashar berý. Ókinishke qaraı, sońǵy kezderi elimizdegi birqatar meıramhana, kafeler men dámhanalardyń ıeleri aýyzashar máziriniń baǵasyn óte joǵary usynyp, halyq arasynda túsinbeýshiliktiń týyndaýyna sebepshi bolýda. Asyl dinimiz aýyzashar dastarqanynda as ta tók ysyrapqa jol berýge, dastarqan jasaýda básekelesýdi quptamaıdy. Ondaı áreket saýapqa emes kúnáǵa jeteleıdi. Aýyzashar dastarqany qarapaıymdylyqqa negizdelýi tıis. Qasıetti Quranda: «… ishińder, jeńder, alaıda ysyrapqa jol bermeńder. Óıtkeni Alla ysyrap etýshilerdi jaqsy kórmeıdi» delingen («Aǵraf» súresi, 31-aıat), — dep atap ótti QMDB baspasóz qyzmeti.

Qazaqstan musylmandary dinı basqarmasy meıramhana, kafeler men tamaqtaný oryndarynyń ıelerine halyqqa qoljetimdi qarapaıym aýyzashar mázirin usynýǵa shaqyrady.

— Alla Taǵala halqymyzǵa eki dúnıe baqytyn násip etip, qasıetti Ramazan aıynda jasaǵan izgi amaldarymyzǵa mol saýaptan jazǵaı. Áýmın!, — dep túıindedi basqarma.

Osyǵan deıin QMDB «Turmysqa shyqqan qyzdyń tegin aýystyrýǵa bola ma» degen saýalǵa jaýap berdi.