QMDB bıylǵy jyldy Din men dástúr jyly dep jarııalady - Bas múftı
ASTANA. QazAqparat - Qazaqstan musylmandary Dinı basqarmasy bıylǵy jyldy Din men dástúr jyly dep jarııalady. Bul týraly búgin Astanada ótip jatqan Qazaqstan musylmandary dinı basqarmasynyń Ramazan aıyna baılanysty QMDB Tóralqa májilisi barysynda Bas múftı Erjan qajy Malǵajyuly aıtty.
«Ózderińiz bilesizder, Qazaqstan musylmandary dinı basqarmasy bıylǵy jyldy Din men dástúr jyly dep jarııalaǵan. Ótken jyly da kóptegen aýyzasharlar ózimizdiń qazaqy dástúrimizben baılanystyrylyp ótkizildi. Bıyl da Qudaı qalasa, osy úrdisten jańylmaımyz. Biz ózimizdiń dinı tanymymyzdy salt-dástúrimizben baılanystyrýǵa tyrysyp jatyrmyz. Búgingi tańda qandaı da bir is-shara ótkizilse, ózindik bir qazaqı dástúri qalyptasyp kele jatyr», - deıdi E. Malǵajyuly.
Dinbasynyń aıtýynsha, Ramazan aıy kezinde eń basty nazarǵa alatyn jaıt - qaltaly azamattardy sý basqan eldi mekenderdegi úısiz-jaısyz qalǵan adamdarǵa meılinshe kómektesýge shaqyrý. «Qudaı qalasa, munyń barlyǵyn uıymdastyratyn jergilikti ımamdar bolady. Jalpy bıylǵy orazaǵa úlken daıyndyqpen kirgeli otyrmyz», - deıdi Erjan qajy.
Aldyn ala málimet boıynsha, bıylǵy pitir-sadaqanyń mólsheri 200 teńge dep belgilengen. Sonymen qatar, ár jerde sáresi men aýyzashardyń ýaqyttary ártúrli bolýyna baılanysty, búgingi Tóralqa májilisinde osy másele jan-jaqty talqylanyp, ár óńirdiń sáresi men aýyzashar ýaqyttary belgilenetin bolady.
Sonymen qatar ol jıyn barysynda jańa úlgi boıynsha ókil ımamdardyń, qalalar men aýyldar ımamdarynyń shapandary bir-birinen ózgeshe bolatynyna toqtaldy. «Imamdar kıetin shapandardyń úlgisine keletin bolsaq, ózderińiz bilesizder, burynǵy Bas múftı Ábsattar qajy da shapannyń birizdi úlgisin shyǵarǵan. Degenmen, olar ártúrli tigin oryndarynda tigilgendikten, tústerinde azdaǵan aıyrmashylyqtar boldy. Búgingi tańda biz bir ǵana tigin ornymen kelisip, shapan úlgisin azdap ózgertip, qazaqtyń oıýlaryn kóbirek qosyp shyǵaraıyq dep jatyrmyz. Sonymen qatar, ókil ımamdardyń shapany bólek bolady, qalalar men aýyldar ımamdarynyń da shapandary bir-birinen ózgeshe bolady», - dep atap ótti Bas múftı. Aıta keteıik, bıyl oraza 18 maýsymda bastalady.
