QMDB basshysy Ramazanda astardy keshki aýyzashar ýaqytynda ótkizýdi usyndy

ASTANA. QazAqparat – Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Ramazan aıyndaǵy qudaıy astardy keshki aýyzashar ýaqytynda ótkizýdi usyndy, dep habarlaıdy QazAqparat tilshisi.

«Osy sátti paıdalanyp, barsha qaýymǵa qasıetti Ramazan aıynda araq-sharap ishilmese jáne dúkenderde satylmasa, múmkindiginshe qudaıy astar keshki aýyzashar ýaqytynda ótkizilse degen tilegimdi jetkizemin. Alla Taǵala Ramazannyń qurmeti úshin jasaǵan jaqsy isimizdiń sebebimen barshamyzdy jaqsylyqqa keneltkeı», - dedi ol ortalyq kommýnıkatsııalar qyzmetinde ótken brıfıngide.

QMDB orazamen baılanysty suraqtary bar adamdarǵa arnap jedel jeli ashqan.

«Eger orazaǵa, jalpy dinı máselege qatysty qandaı da suraqtaryńyz bolsa, Qazaqstan musylmandary dinı basqarmasy janynan Dinı aqparat berý ortalyǵy ashylǵanyn taǵy da qaperlerińizge salamyn. Jamaǵattyń suraǵyna der kezinde jaýap beretin ortalyqtyń nómiri 8 7072333030. Uıaly baılanys arqyly habarlasyp, kókeıde júrgen suraqtaryńyzǵa jaýap alasyz. Din salasynyń bilikti mamandary táýlik boıy qazaq jáne orys tilindegi suraqtarǵa jaýap beredi», - dedi Naýryzbaı qajy Taǵanuly.