QMDB Astanada jastar arasynda súıisýden bolatyn jarysqa qatysty málimdeme jasady

«Ǵasyrlar boıy musylman bolyp kelgen qazaq eli nebir zulmattardan aman ótip, jańa zamanǵa aıaq tirep, eńsesin tiktep, ımandy ómirge bet bura bastaǵanda, «jer astynan jik shyqty, eki qulaǵy tik shyqty». Saryarqanyń tósinde, dálirek aıtqanda, ásem qala Astanada jastar arasynda soraqy saıys ótkizý týraly «bastama» esti jurtty eleń etkizdi hám ult pen din janashyrlarynyń narazylyǵyn týdyrdy. Oǵan 13 shilde kúni ótetin saıysta Astana jastarynyń ardan bezýi sebep bolmaq», - deıdi QMDB.

Taratylǵan málimetke sáıkes, osyǵan deıin, naqty aıtqanda, 2010 jyldyń 25 jeltoqsanynda atalǵan jarysty uıymdastyrýshylar «Nur Astana» meshiti janyndaǵy «ASIA PARK» saýda úıinde tyrdaı jalańash jastar jarysyn ótkizgen bolatyn. Endi eki kún boıy (48 saǵat) buǵanasy bekimegen, rýhanı dińgegi qatpaǵan jastardy uzaq súıisýden jarystyrmaq.  

«Jastardy jalańashtaý da, súıistirý de - túptep kelgende ultty azǵyndyqqa salýdyń alǵashqy baspaldaqtary. Bul bizdiń eldiń ımandylyǵy men adamshylyǵyn sarapqa salary anyq. «Kúnáli ispen «Gınnes» kitabyna enemiz» degen oıdyń ózi netken qorqynyshty, ári jıirkenishti»,-deıdi QMDB.

 «San ǵasyrdan beri ulynyń ımany men qyzynyń ıbasyn ómirine tirek etip kelgen momyn qazaqtyń ishinen osyndaı paıymsyz tentegin tııatyn atqa miner tabylmaıdy degenge sengimiz kelmeıdi. Kúni keshe ǵana búkil qazaq musylman el ekenimizdi aıdaı álemge pash ettik. Ǵajaıyp «Áziret Sultan» meshiti ashyldy. Mine, búginde rýhanı kelisimniń ordasyna aınalǵan Astanada ult bolashaǵy - ul men qyzymyzdy súıisýden jarystyrý qanshalyqty oryndy? Áı deıtin áje, qoı deıtin qoja bolmasa, erteń elimizde ashyq zına jasaýdan baıqaý ótkizemiz deıtinder shyqpasyna kim kepil? Adamzattyń asyly ardaqty paıǵambarymyz Muhammed Mustafa (s.ǵ.s.) hadısteriniń birinde: «Eger bir jamandyqty kórseń, qolmen túzet, oǵan shamań kelmese, tilmen aıt, oǵan da kúshiń jetpese, júrekpen jek kór. Bul - ımannyń eń álsizi», - degen. Endeshe el tórinde osyndaı soraqy isti boldyrmaýǵa barshamyz jaýaptymyz. Sondyqtan «arym - janymnyń sadaǵysy» dep ótken arda qazaqtyń búgingi urpaqtary bul iske beı-jaı qaramaıdy degen senimdemiz», - delingen málimdemede.