QMDB «Ásem kıim - áıel kórki» baıqaýyn jarııalady
ALMATY. 18 mamyr. QazAqparat /Ádilet Musahaev/ - Qazaqstan Musylmandarynyń Dinı basqarmasy sán sheberleri arasynda musylman qyz-kelinshekterge arnalǵan sharıǵat talabyna saı, qazaqy naqyshtarmen árlengen, zamanǵa sáıkes keletin tigilgen kıim úlgilerin jasap shyǵarýdan respýblıkalyq «Ásem kıim - áıel kórki» baıqaýyn jarııalap otyr.
Sońǵy jyldarda musylman qyz-kelinshekterdiń sharıǵat talabyna saı kıinýi elimizde kóp talqylanatyn ózekti taqyrypqa aınaldy. Negizinde, qasıetti Qurannyń «Nur» súresinde sharıǵatqa saı kıinýdiń paryzdyǵy men talaptary anyq aıtylǵan. Ata-babalarymyz mádenıetimiz ben ǵurpymyzǵa, ulttyq salt-sanamyzǵa saı san túrli ásem, ári kelisti ulttyq tól kıim úlgilerin (sáýkele, oramal, kımeshek, t.b.) jasap shyǵarý arqyly sol talaptardy tolyq oryndap kelgen. Alaıda zaman men talǵamnyń ózgerýine baılanysty qazir bul sanattaǵy kıimder tek sahnada ǵana kıiledi. Al sharıǵat boıynsha kıingisi kelgen qyz-kelinshekter shetelde tigilgen kıimderdi alyp kııýge májbúr.
Kıim úlgilerine mynandaı talaptar qoıylǵan: birinshiden, Sharıǵat talaptaryna saı bolýy tıis; ekinshiden, kıim úlgilerinde qazaq halqynyń ulttyq naqyshtary kórinis tabýy kerek; úshinshiden, búgingi zaman estetıkasy men talǵamyna saı bolýy shar; tórtinshiden, kıim úlgisi kórikti jáne qoǵamdyq oryndarda kúndelikti kıip júrýge jeńil ári yńǵaıly bolýǵa tıis.
Tigilgen kıim jobasynyń jpg formatyndaǵy túrli-tústi sýreti 2011 jylǵy 1 qyrkúıekke deıin bayge2011@mail.ru elektrondy poshtasyna jiberilýi qajet.
Saraptaý barysynda bas kıim, jumys kıimi jáne kúndelikti kıim úlgileri basty nazarǵa alynbaq.
Jeńimpazdar arnaıy uıymdastyrylatyn saltanatty keshte marapattalady.
Baıqaý júldelerine kelsek: Bas báıge - «Eń úzdik bas kıimge» - 750 000 teńge, І orynǵa - 500 000, ІІ oryn - 400 000, ІІІ oryn - 300 000 teńgeden 2 adamǵa jáne yntalandyrý syılyqtary 150 000 teńgeden bes adamǵa beriledi.
Baıqaýdyń Bas demeýshisi, «Meıirimdilik joly - 2010» qoǵamdyq qory.
