QMBD: 2014 jyl - «Din men dástúr» jyly
ASTANA. 20 qańtar. QazAqparat - Qazaqstan musylmandary dinı basqarmasynyń tóraǵasy, Bas múftı Erjan qajy Malǵajyuly elimizdiń ımam-moldalary men dintanýshy-ǵalymdary úshin 2014 jyl - «Din men dástúr» jyly dep jarııalady, dep habarlaıdy QMDB baspasóz hatshysy Aǵabek Qonarbaıuly.
Múftı-hazrettiń meshit ımamdaryna joldaǵan Úndeýinde dinimiz ben dástúrimizdi jańǵyrtý jolynda birqatar máselelerge basa nazar aýdaryldy. Qazaqstan musylmandary dinı basqarmasy osy baǵytta tómendegideı is-sharalar men ıgi jobalardy júzege asyratyn bolady:
1. Tilimizdiń qoldanys aıasyn keńeıtip, dinimiz ben dilimizdi jańǵyrtý; 2. Islammen bite qaınasqan saltymyzdy nasıhattaý; 3. Jastardyń boıyna ulttyq qundylyqtar men dástúrli tálim-tárbıeni qalyptastyrý; 4. Imandylyqty jyrlaǵan qazaqtyń aqyn-jazýshylary, jyraýlary, bı-sheshenderi men qaıratkerleriniń tulǵalyq qasıeti men baǵa jetpes baı murasyn nasıhattaý; 5. Jamaǵatqa sharıǵattaǵy ádet-ǵuryptyń orny men rólin túsindirý; 6. Jamaǵatty salt-dástúrdi qurmetteýge, qasterleýge úgitteý; 7. Jastardy otansúıgishtikke tárbıeleý. «Osy baǵytta konferentsııalar men kezdesýler uıymdastyrýdy, arnaıy ýaǵyz-nasıhat júrgizýdi, kitapshalar shyǵarýdy, teleradıo jobalaryn júzege asyrýdy tapsyramyn», - delingen Erjan qajy Malǵajyulynyń ımamdarǵa joldaǵan Úndeýinde. Aıta ketken abzal, jýyrda Bas múftıdiń bastamasymen «Din men dástúr» atty kitap jamaǵatqa jol jartty. Qazaqstannyń halyq jazýshysy Sherhan Murtaza bastaǵan, ádebıettanýshy-ǵalym Tursynbek Kákishev qostaǵan ultymyzdyń qos qanatty ispettes - din men dástúrdiń sabaqtastyǵyn nasıhattaıtyn tuńǵysh týyndy zııaly qaýym ókilderiniń qyzý qoldaýyna ıe boldy. Alǵashqy izdenistiń jemisi bolǵan «Din men dástúr» kitabynyń ekinshi, úshinshi tomyn shyǵarý kózdelip otyr.
