QMA turǵyndarǵa tıimsiz shartpen qaryz bergen mıkroqarjy uıymyn tekserip jatyr
ASTANA. KAZINFORM - Qarjylyq monıtorıng agenttiginiń Qostanaı oblysy boıynsha departamenti zańsyz mıkrokarjylyq qyzmetin atqarý faktisi boıynsha sotqa deıingi tergeý júrgizip jatyr.
Kúdikti 2020 jyldan bastap tıisti lıtsenzııasyz azamattarǵa paıyzben jáne múlik kepildigimen «OLX» pen «Instagram» mobıldi qosymshalary arqyly qaryz bergen.
Kelisimshart jasasý kezinde nesıelik mámileni zańdy etip kórsetý úshin ol qaryz somasyn shyn mánindegi somadan áldeqaıda kóp etip kórsetken. Sebebi bul somaǵa jyldyq 100%-ǵa deıin baratyn aldyn ala eseptelgen syıaqylar engizilgen.
Osylaısha kúdikti jalpy kólemi 100 mln teńgeden astam qarajatty qaryzǵa bergen.
Aıta ketý kerek, onyń zańsyz áreketteriniń saldarynan qarapaıym azamattardyń quqyqtary men múddeleri buzylǵan. Olar qaryz alýdyń tıimsiz, aýyr sharttarynyń qurbanyna aınalǵan.
Jedel qarjylyq kómek izdegen olar joǵary paıyzdyq mólsher men múlkinen aıyrylý qaýpi bar qarjylyq tuzaqqa túsken.
Zańsyz jolmen alynǵan tabystyń kózin jasyrý úshin kúdikti tanys býhgalterdi tartqan. Birigip, olar aqshany jylystatýdyń shemasyn jasap, tabysty kólik jóndeý qyzmetimen aınalysatyn kásiporynnyń zańdy kirisi retinde kórsetken.
Ol úshin kúdikti jeke kásipker retinde tirkelip, shyn máninde jumys istemeıtin kólik jóndeý stantsııasynyń atynan fıskaldyq chekter shyǵaryp otyrǵan.
Nátıjesinde, kúdikti zańsyz qyzmetinen túsken 60,6 mln teńgeden astam kiristi zańdastyrǵan.
Sottyń sanktsııasymen tárkileý maqsatynda onyń páterine jáne banktik shottaryndaǵy 28 mln teńge somasyndaǵy qarajatyna tyıym salyndy.
Tergeý jumystary jalǵasýda.
QR Qylmystyq-protsestik kodeksiniń 201-babyna sáıkes ózge aqparat jarııalaýǵa jatpaıdy.
- Eger siz ekonomıkalyq quqyq buzýshylyqtar faktileri jaıly bilseńiz, «AFM Insider» telegram botyna habarlaýyńyzdy suraımyz, - delingen habarlamada.
Anonımdilikke kepildik beriledi.
Osyǵan deıin Ulttyq bank jalǵan nesıelik shottardy paıdalaný arqyly jasalatyn alaıaqtyq shema týraly eskertken bolatyn.