Tanymal bloger Mahmýd Hıkmatovqa halyqaralyq izdeý jarııalandy
ASTANA. KAZINFORM — Qarjylyq monıtorıng agenttigi Ózbekstan azamaty, «Maha.dxb» atymen tanymal bolǵan bloger Mahmýd Hıkmatovqa halyqaralyq izdeý jarııalady.
Vedomstvonyń málimetinshe, ol «SultanGames», «PINCO», «Nomadcasino», «Pin-Up», «Vavada» jáne basqa da zańsyz ınternet-kazınolardy jarnamalap, nasıhattady degen kúdikke ilingen. Sot kúdiktini qamaýǵa sanktsııa bergen.
Agenttiktiń habarlaýynsha, Qazaqstanda ınternet-kazınolardyń zańsyz jumys isteýine jaǵdaı jasaıtyn júıe qurylǵan.
— Osy júıe arqyly ınternet-kazıno ınterfeısi usynylyp, aqsha qabyldaý jáne tóleý jolǵa qoıylǵan. Ol úshin ekvaırıng, mobıldi tólemder men krıptovalıýta paıdalanylǵan. Sondaı-aq el azamattaryn qumar oıyndarǵa kóptep tartý maqsatynda jarnama taratylǵan. Internet-kazınolardy jarnamalaý úshin uıymdastyrýshylar bloger M. Ý. Hıkmatovty tartqan. Oǵan Qazaqstanda jumys isteıtin ınflıýenserlerdi taýyp, solar arqyly jarnamalyq materıaldar jarııalatý mindeti júktelgen, — delingen habarlamada.
Hıkmatov blogerlerden áleýmettik jelidegi paraqshalarynyń statıstıkasyn, sonyń ishinde jazylýshylarynyń demografııalyq jáne geografııalyq kórsetkishterin, sondaı-aq jarııalanymdardyń qamtý aýdıtorııasy týraly aqparatty jınaǵan. Jarnama quny osy kórsetkishterge qaraı belgilengen.
Agenttik málimetinshe, ol osylaısha 35-ten astam blogerdi, onyń ishinde Qaısar Qamza esimdi blogerdi tartqan.
Aýdıtorııasy keń Qaısar Qamza ınternet-kazınolarǵa aparatyn referaldyq siltemelerdi jarııalap, Qazaqstan azamattaryn tyıym salynǵan qumar oıyndarǵa tartqan. Ol árbir paıdalanýshynyń silteme arqyly ótkeni úshin syıaqy alyp otyrǵan.
Qarjylyq monıtorıng agenttigi izdeýdegi Mahmýd Hıkmatovtyń qaıda júrgeni týraly qandaı da bir aqparat biletin azamattardy kezekshi bólimge habarlasýǵa shaqyrady: +7 (717-27) 0-84-78.
Agenttik aqparat bergen azamatqa syıaqy tólenetinine jáne onyń aty-jóni qupııa saqtalatynyna kepildik beredi.
Aıta keteıik, buǵan deıin Qarjylyq monıtorıngi agenttiginiń Astana boıynsha ekonomıkalyq tergeý departamenti 26 jastaǵy Mahmýd Hıkmatovqa izdeý salǵanyn habarlaǵanbyz.
Onyń aldynda qazaqstandyq tanymal bloger Qaısar Qamza bıyl 6 tamyzda Vetnamnan Qazaqstanǵa ekstradıtsııalanǵan edi.
