QMA Shymkentte halyqaralyq onlaın-kazıno jelisin áshkereledi
ASTANA. KAZINFORM – QMA Shymkent qalasy boıynsha departamenti zańsyz oıyn bıznesimen aınalysqan qylmystyq toptyń qyzmetin toqtatty.
Shymkent qalasynyń turǵyny mobıldi qosymsha arqyly jumys istegen jasyryn ınternet-kazınony uıymdastyryp, onyń jumysyn úılestirgen.
Qylmystyq shemany iske asyrý úshin poker oınaýǵa arnalǵan («Tehas holdem») mobıldi qosymsha paıdalanylǵan. Onda «Vendetta» jáne «AMG600L» atty oıyn klýbtary qurylyp, olar «Nomad» jelisine biriktirilgen.
Atalǵan klýbtar táýlik boıy jumys istep, Qazaqstannan bólek Ózbekstan men Qyrǵyzstan sııaqty elderdiń oıynshylaryn da tartqan.
Klıentter sanyn kóbeıtý úshin messendjerler arqyly maqsatty habarlamalar jiberilip, túrli bonýstar men yntalandyrý júıesi qoldanylǵan.
Oıynshylar óz esepshottaryn bank shottaryna aqsha aýdarý arqyly toltyryp, sonyń negizinde oıynǵa qatysýǵa múmkindik beretin «fıshkalar» alǵan. Utqan jaǵdaıda qarajat qolma-qol aqshaǵa aınaldyrylyp, paıdalanýshylardyń kartalaryna aýdarylyp otyrǵan.
Uıymdastyrýshylardyń tabysy ár oıyn ústelinen alynatyn 3–5% kólemindegi komıssııa («reık») esebinen qalyptasyp, turaqty kiris ákelip otyrǵan. Sonymen qatar oıynshylardy ustap qalý úshin olarǵa vırtýaldy qarajatty qaryzǵa berý tájirıbesi de qoldanylǵan.
Qarjy aǵymdaryn jasyrý maqsatynda «dropperlerdiń» bank shottary, onyń ishinde shetel azamattarynyń shottary paıdalanylǵan. Shot bergeni úshin olarǵa árbir esepshotqa 100–200 myń teńge kóleminde syıaqy tólengen.
Atalǵan shottar boıynsha jalpy aqsha aınalymy 557 mln teńgeden asqan.
Sondaı-aq tintý barysynda uıymdastyrýshynyń turǵylyqty jerinen esirtki zaty tabylyp, tárkilendi.
Eki kúdiktige qatysty úıqamaq túrindegi bultartpaý sharasy qoldanyldy.
Qylmystyq is sotqa joldandy.
Aıta ketelik Shymkentte psıhotroptyq zattarmen ustalǵan kúdikti qamaýǵa alynǵan edi.
