QMA Qostanaı oblysynda esirtki satýmen aınalysqan iri Telegram-arnany buǵattady
QOSTANAI. KAZINFORM — QMA Qostanaı oblysy boıynsha departamenti Prokýratýranyń úılestirýimen áleýmettik jeliler arqyly esirtki taratýmen aınalysqan arnany anyqtap, onyń qyzmetin toqtatty
QMA málimetinshe, kúdiktiler 2024 jyldyń mamyrynan bastap «Ths Seller» ataýymen Telegram-arnasynda ınternet-dúken uıymdastyryp, esirtki zattaryn satqan. Tólemder qolma-qol aqsha jáne krıptovalıýta arqyly qabyldanǵan. Tintý barysynda 30 keliden astam marıhýana men gashısh, uıaly telefondar jáne 5 bank kartasy tárkilengen.
Anyqtalǵandaı, ınternet-dúkenniń 2 myńnan astam tutynýshysy bolǵan, jáne 100 mıllıon teńgeden astam somaǵa 5 myńnan astam esirtki saýdasy júrgizilgen.
Qylmystyq jolmen kelgen tabysty jasyrý maqsatynda kúdiktiler Telegram messendjeri arqyly droptardy – ıaǵnı jalǵan tulǵalardy – tartqan. Bul tulǵalar atyna bank kartalary rásimdelip, sol kartalar arqyly iri kólemdegi aqshalaı qarajat qolma-qol aqshaǵa aınaldyrylǵan, - delingen habarlamada.
Esirtki tasymaly úshin kúdiktiler qylmystyq tabystyń esebinen 2 avtokólik pen mototsıkl satyp alyp, olardy senimdi adamdardyń atyna tirkegen. Sot sanktsııasymen bul kólik quraldar tárkilendi. Kúdiktiler eki aı merzimge qamaýǵa alyndy.
Tergeý jalǵasady.
Aıta keteıik, jaqynda Qarjylyq monıtorıng agenttigi Telegram-da jańa botty iske qosty.