QMA gıdrotehnıkalyq nysandarǵa bólingen aqshanyń maqsatty jumsalýyn tekseredi
ASTANA. KAZINFORM – Qarjylyq monıtorıng agenttigi gıdrotehnıkalyq nysandardy salýǵa bólingen qarajattyń oryndy jumsalýyn qadaǵalaıdy. Bul týraly QMA-nyń baspasóz qyzmeti málim etti.
Mundaı tapsyrma QMA tóraǵasy Dmıtrıı Malahovtan túsken. Ol bólingen aqshanyń qaıda ketkenin sapaly tekserý men baǵalaýdy qamtamasyz etý qajettigin aıtyp ótti.
«Agenttiktiń aýmaqtyq departamentteriniń basshylary memlekettik organdar men sharýashylyq sýbektileriniń qyzmetine aralaspaı, bógetter, sý burý obektilerin salý, sondaı-aq ózen arnalaryn tereńdetý úshin aqshany utymdy paıdalanýdy zerdeleýi qajet», — dep tapsyrdy D. Malahov.
Eske sala keteıik, Memleket basshysynyń tapsyrmasy boıynsha Úkimet, kvazımemlekettik kompanııalar, kásipkerler, qoǵamdyq qorlar 140 mlrd teńgeden astam qarjy bóldi.
QMA basshysy sý tasqyny saldaryn joıý úshin bólingen aqshany maqsatty paıdalaný sondaı-aq kómek zardap shekken azamattarǵa naqty jetýdi qamtamasyz etýdi tapsyrdy.
«Osylaısha, qarjylyq monıtorıng organdary Almaty qalasynda, Aqtóbe, Qyzylorda jáne Ulytaý oblystarynda jymqyrý belgileri boıynsha tórt is qozǵady. 5 adam kúdikti dep tanyldy. Zalaldyń jalpy somasy 1 mlrd teńgeden asty. Sonymen qatar, aldyn-alý jumystary zardap shekkenderge kómektesý úshin aqsha jınaýdy jarııalaıtyn alaıaqtarǵa qarsy turýǵa baǵyttalatyn bolady», - delingen habarlamada.
Baǵanyń ósýine jol bermeýge erekshe nazar aýdarý tapsyryldy. Ol úshin azyq-túlik, aýyz sý, dári-dármek jáne basqa da qajetti zattar baǵasynyń monıtorıngi jalǵasatyn bolady. Agenttik sonymen qatar qurylys materıaldarynyń baǵasymen alypsatarlyq táýekelderin aldyn alý qyzmetin de jandandyrady. Anyqtalǵan faktilermen kúres analıtıkalyq quraldardy paıdalana otyryp júrgiziletin bolady.
Qoryta kelgende, Agenttik basshysy baǵany negizsiz kóterýge jol bermeý boıynsha jergilikti atqarýshy organdarmen jumysty jandandyrýdy jáne yqtımal manıpýlıatsııalardy boldyrmaý jóninde usynystar ázirleýdi tapsyrdy.
