247,5 mln teńge paıda tapqan: erli-zaıypty blogerler isi boıynsha tergep-tekserý aıaqtaldy

ASTANA. KAZINFORM – QMA blogerler Erbolat Janabylov pen Elmıra Tolegenovaǵa qatysty sotqa deıingi tergep-tekserýdi aıaqtady. 

QMA Astana qalasy boıynsha departamenti zańsyz kásipkerlik qyzmetpen aınalysý jáne qylmystyq jolmen alynǵan aqsha qarajatyn zańdastyrý faktileri boıynsha blogerler Erbolat Janabylov pen Elmıra Tolegenovaǵa qatysty sotqa deıingi tergep-tekserýdi aıaqtady.

— Tergeý amaldaryna saı, Instagram áleýmettik jelisinde (15 mıllıonnan astam jazylýshysy bar) kóp mıllıondyq aýdıtorııaǵa ıe erli-zaıyptylar óz jazylýshylarynyń senimin zańsyz tabys tabý maqsatynda paıdalanǵan. 2025 jyly olar onlaın-kýrstardy satý degen jeleýmen zańsyz shema uıymdastyrǵan. Atalǵan «kýrstardy» satyp alýdyń negizgi sebebi — qymbat syılyqtar utysyna qatysý bolǵan, — delingen habarlamada.

Taratylǵan beınematerıaldar basym bóligi ashyq derekkózderden, sonyń ishinde YouTube platformasynan alynǵan. Bul kýrstardyń naqty bilim berý qundylyǵy bolmaǵan jáne olar zańsyz lotereıa qyzmetin formaldy túrde jasyrý úshin ǵana paıdalanylǵan.

— Júlde qory jarııa túrde málimdelgendeı jeke qarajat esebinen emes, onlaın-kýrstarǵa aqy tóleý túrinde qatysýshylardan túsken aqsha qarajaty esebinen qalyptastyrylǵan.

Elektrondy «sáttilik barabanynyń» parametrlerin ózgertý faktileri anyqtaldy, sonyń nátıjesinde 5 000 teńgelik júldeni utyp alý yqtımaldyǵy jasandy túrde arttyrylyp, al qundy júldelerdi utyp alý múmkindigi edáýir tómendetilgen.

Kúdiktiler jarııa túrde eń kóp repost jasaǵan qatysýshyǵa 11-shi avtokólik tabystalǵany týraly málimdep, aktsııanyń qamtý aıasyn keńeıtý men nazar aýdarý maqsatyn kózdegen. Alaıda is júzinde jeńimpaz anyqtalmaǵan jáne syılyq tabystalmaǵan, — delingen QMA habarlamasynda.

Nátıjesinde azamattardan «Zhana Business» JShS-niń baqylaýyndaǵy shottarǵa túsken qarajattyń jalpy somasy - 247,5 mln teńge, onyń 60 mln teńgesi depozıttik shottarǵa ornalastyrylǵan.

Sot sanktsııasymen 17 iPhone uıaly telefonyna jáne Lamborghini Urus pen Lexus LX 600 avtokólikterin qosa alǵanda, 10 avtokólikke tyıym salyndy.

Kúdiktilerge qatysty úıqamaq túrindegi bultartpaý sharasy tańdaldy.

Qazirgi ýaqytta kúdiktiler qylmystyq is materıaldarymen tanysýǵa kiristi.

Qylmystyq-protsestik kodeksiniń 201-babyna sáıkes ózge aqparat jarııa etýge jatpaıdy.

Eske sala ketsek, jelide birneshe avtokólik utysyn jarııalaǵan qazaqstandyq blogerler Erbolat Janabylov pen Elmıra Tólegenova áreketin Týrızm jáne sport mınıstrligi nazaryna aldy. Keıin is sotqa jetken edi.

Sondaı-aq Týrızm jáne sport mınıstrligi Oıyn bıznesin jáne lotereıany retteý komıtetiniń ókilderi bloger Erbolat Janabylov jarııalaǵan kýrs baǵasy negizsiz qymbat ekenin málimdedi.

5 qyrkúıekte Astanada bloger Erbolat Janabylovqa qatysty alǵashqy sot otyrysy ótti.

Sot barysynda bloger Erbolat Janabylovtyń advokaty sýdıadan isti toqtatýdy surady.

Atalǵan jaıtqa qatysty Týrızm jáne sport mınıstri Erbol Myrzabosynov jeke túsinik berdi.