QMA: «Asar Baspana» qarjy pıramıdasynyń zańsyz qyzmeti toqtatyldy

ASTANA. KAZINFORM — Tintý barysynda uıymdastyrýshylardan 1,2 mlrd teńgeden astam qolma-qol aqsha jáne premıým klasty markalary bar kólik 13 tárkilendi.

Qarjylyq monıtorıng agenttigi Bas prokýratýranyń úılestirýimen bıylǵy jyldyń 8-10 aqpany aralyǵynda elimizdiń barlyq óńirinde keń aýqymdy operatsııa júrgizdi. Nátıjesinde tutyný kooperatıviniń atyn jamylǵan «Asar Baspana» qarjy pıramıdasynyń zańsyz qyzmeti toqtatyldy.

Qarjy pıramıdasyn uıymdastyrýshylar salymshylarǵa jyljymaıtyn múlikti, kólik quraldaryn, sondaı-aq turmystyq ónimderdi (bıologııalyq belsendi qospalar, as úı ydystary, kosmetıka, turmystyq hımııa jáne basqa da taýarlar) satyp alý úshin qarajat salýdy usynǵan. Al qarymyna aı saıyn salynǵan somanyń 30%-na deıin paıda tabýǵa ýáde bergen.

— Kompanııalardyń keńselerinde jáne kúdiktilerdiń turǵylyqty jeri boıynsha júrgizilgen tintý barysynda 1,2 mlrd teńgeden astam somada qolma-qol aqsha jáne ishinde premıým klasty kólikter bar 13 avtomashına tárkilendi. Eki qarjylyq pıramıda uıymdastyrýshy ustalyp, olarǵa qatysty sot eki aı merzimge qamaýǵa alý túrindegi is-shara sanktsııalady, — dedi QMA resmı ókili Ernar Taıjan. 

Onyń sózinshe, qazir sotqa deıingi tergeý jalǵasýda. 

Osyǵan deıin Túrkistanda 4 qarjy pıramıdasynyń jumysy toqtatylǵanyn jazdyq.