QMA Áleýmettik medıtsınalyq saqtandyrý qorynyń qarajatyn jymqyrýǵa qatysty bes isti tergep jatyr
ASTANA. KAZINFORM — Qazaqstan Respýblıkasynyń Qarjylyq monıtorıng agenttigi Áleýmettik medıtsınalyq saqtandyrý qorynyń qyzmetine baılanysty qylmystyq isterdiń tergelý barysy jóninde túsinikteme berdi, dep habarlaıdy Kazinform agenttiginiń tilshisi.
Agenttiktiń málimetinshe, 2025 jyly Ekonomıkalyq tergep-tekserý qyzmetiniń óndirisinde qor qarajatyn jymqyrýǵa baılanysty bes qylmystyq is bolǵan. Atalǵan ister boıynsha bes adam kúdikti dep tanylǵan. Tergeý qorytyndysymen bir is sotqa joldanyp, qalǵan tórt is boıynsha sotqa deıingi tergeý jalǵasyp jatyr.
Agenttik atap ótkendeı, Qylmystyq-protsestik kodekstiń 201-babyna sáıkes sotqa deıingi tergeý derekteri jarııalanbaıtynyn jáne olar tek prokýrordyń ruqsatymen, tergeý múddesine nuqsan keltirmeıtin ári ózge tulǵalardyń quqyqtary men zańdy múddelerin buzbaıtyn kólemde ǵana jarııa etiletinin atap ótti.
Eske sala keteıik, Memleket basshysy Qasym-Jomart Toqaev Ulttyq quryltaı otyrysynda Áleýmettik medıtsınalyq saqtandyrý qory qyzmetinde eleýli zańbuzýshylyqtar bar ekenin aıtyp, áleýmettik saladaǵy jemqorlyq tetikterine qatysy bar tulǵalardy anyqtaýdy tapsyrǵan edi.
Sondaı-aq Úkimet basshysy Qor qarjysyn jymqyrǵan kináli tulǵalar zań aıasynda jaýapqa tartylatynyn málimdedi.