Qumar oıyndardy nasıhattaýǵa qatysy bar 34 blogerdiń esimderi ataldy

ASTANA. KAZINFORM — Olardyń 11-i ákimshilik jaýapkershilikke tartyldy, al 23 kontent jasaýshyǵa qatysty materıaldar Mádenıet mınıstrligine shara qabyldaý úshin joldandy, dep habarlaıdy QMA baspasóz qyzmeti.

Óskeleń urpaq qumar oıynǵa táýeldilikke urynyp, saldarynan ishimdik pen esirtkige áýestik sııaqty basqa da jaǵymsyz qumarlyqtarǵa beıim bolady. Onlaın-kazınolardyń qyzmeti kóbinese esirtki saýdasynan men qarjylyq alaıaqtyqtan túsken qylmystyq tabysqa negizdeledi.

Jańa «klıentterdi» tartý úshin olardyń ıeleri mıllıondaǵan oqyrmany bar otandyq blogerlerdi paıdalanady. Olar ońaı paıda tabýdy kózdep, qarapaıym azamattardy qarjylyq tuzaqqa túsiredi. 

Jyl basynan beri Qarjylyq monıtorıng agenttigi 34 blogerdiń onlaın-oıyndardy jarnamalaýǵa qatysy baryn anyqtady.

— Olardyń ishinde: Qaısar Qamza, Shyńǵyshan Kópbaev, Aıtmahanov Táýirjan, Turǵanov Naıl, Dılıara Amanqosqyzy jáne basqalar bar. Olardyń 11-i ákimshilik jaýapkershilikke tartyldy, al 23 kontent jasaýshyǵa qatysty materıaldar Mádenıet mınıstrligine shara qabyldaý úshin joldandy, — dep atap ótti agenttik.

Vedomstvo málimetinshe, kópshiligi zańdy bir ret emes, júıeli túrde buzady.

— Máselen, hıp-hop oryndaýshy «Baller» (shyn aty — Shyńǵyshan Kópbaev) jyl basynan beri atalǵan bap boıynsha bes ret jaýapqa tartyldy. 600 myńnan astam jazylýshysy bar mýzykant-bloger Rınat Shamshyraqqa qatysty da onlaın-kazıno jarnamalaǵany úshin ákimshilik is qozǵalǵan. Sonymen qatar bloger «Niko_nett» pen ınflıýenser Qaısar Qamza da erekshe nazarda. Sońǵysy óziniń telegram-arnasynda zańsyz oıyndardy únemi nasıhattap, jalǵan jeńimpazdardyń vıdeolaryn jarııalap keledi. Sol sııaqty, Naıl Turǵanov onlaın-kazıno jarnamasy úshin 8 mln teńgeden astam qarjy alǵan. Al Nurǵazy Toqtarov («Nakonay Qarapaiym») áleýmettik jelilerinde azamattardy zańsyz oıyndarǵa tartý maqsatynda agressıvti naýqan júrgizip, jarnama úshin 15,8 mln teńge alyp, onyń jartysyna jýyǵyn sol platformalardyń ózinde oınap utylyp qalǵan, — dep túsindirdi QMA baspasóz qyzmeti.

Agenttik málim etkendeı, bul iste bloger qyzdar da belsendi. 

— Marııam Quljabaeva («@oomariko») ınternet-kazınoda tirkelýge shaqyrǵan qarapaıym storısterin nebary 350 myń teńgege baǵalaǵan. Al onyń qurbany bolǵan otbasylar mıllıondaǵan qarjysynan aıyrylyp jatyr. Oǵan qosa, Zýhra Hakıeva, Dıana Halmetova, Ásem Aýbakırova, Arına Baıkova, Kúmisaı Aıymbetova jáne basqa da blogerlerdiń aty belgili, — dep atap ótti vedomstvo.

Osylaısha, onlaın-kazıno jarnamasy oıynǵa táýeldilikke bastaıtyn negizgi arna ekenin bile tura, atalǵan tulǵalar óz isterin jalǵastyryp jatyr.

— Olar adamdardyń taǵdyryna nemquraıly qarap, otbasylardyń kúıreýine sebep bolyp otyr. Mıllıondaǵan tabysqa kenelgen blogerler aıyppuldaryn tólep, zańsyz áreketin qaıta jalǵastyryp júr. Osyǵan baılanysty Agenttik mundaı áreketterdi QR QK-niń 28-babynyń 5-tarmaǵy aıasynda — zańsyz oıyn bıznesine kómektesý retinde qarastyrýǵa nıetti. Sonymen qatar, qarjy pıramıdalaryn jarnamalaǵandaı, onlaın-kazıno jarnamasy úshin de qylmystyq jaýapkershilik engizý bastamasy kóterildi, — dep túıindedi QMA.

QMA blogerlerge úndeý jasap, jarnama túrindegi kontent taratýmen aınalysatyn árbir tulǵa zańdy qatań saqtaýy tıis ekenin aıtty. Agenttik zańsyz oıyndardy nasıhattaýdan bas tartyp, adamdar aldyndaǵy jaýapkershilikti sezinýge shaqyrady. 

Buǵan deıin ShQO-da qumar oıynǵa shaqyratyn blogerler men akkaýntar anyqtaldy.