Kim jasasa, sol tólesin — Prezıdent vedomstvolyq júıelerdi bir platformaǵa kóshirý shyǵyndary týraly
ASTANA. KAZINFORM — Memleket basshysy Qasym-Jomart Toqaev eldegi vedomstvolyq aqparattyq júıelerdi QazTech biryńǵaı platformasyna kóshirý jumysy kimniń qarajatyna jasalatynyn surady.
Búgin Úkimettiń keńeıtilgen otyrysynda Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev eldegi júıelerdiń bytyrańqylyǵyn joıý úshin olardy QazTech biryńǵaı platformasyna kezeń-kezeńimen kóshirý qajettigin aıtqan edi.
— Al endi kóreıik, muny tekserý kerek. Sizdiń aıtqanyńyzdan túsingenim — bir-birinen bólek jatqan barlyq vedomstvolyq baǵdarlamalardy QazTech platformasyna «ornalastyrý» qajet. Bul naqty qalaı júzege asady? Bas prokýratýradaǵy keńeste oǵan qajetti soma mólsheri ataldy, bul jóninde keıinirek pikir aıtamyn. Biraq munyń bárin kim jasady, sonyń bárin ózi tólesin, — dedi Prezıdent Q. Toqaev.
Óz jaýabynda sala mınıstri QazTech-ke kóshý protsesi kezeń-kezeńimen júrgiziletinin aıtyp aqtaldy.
— Bıyl aqparattyq júıelerdiń 30 paıyzy platformaǵa kóshiriledi. Sonymen qatar keıbir eski júıeler anyqtaldy, olardy QazTech-ke kóshirýdiń máni joq. Bul júıeler tolyǵymen qaıta jazylady. Nátıjesinde úsh jyldyń ishinde 190 júıeniń ornyna 90 shaqty júıe qalady, — dedi Jaslan Mádıev.
Óz kezeginde Prezıdent bul máselege taǵy oralatynyn aıtty.
— Biz bul máselege taǵy oralamyz. Ázirge qalaı júzege asyrylatynyny, qashan daıyn bolatyny túsiniksiz, — dep túıindedi Prezıdent.
Aıta keteıik, Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr. Onda elimizdiń 2025 jylǵy áleýmettik-ekonomıkalyq damýy qorytyndylanyp, aldaǵy kezeńge arnalǵan negizgi mindetter aıqyndalady.
Buǵan deıin Memleket basshysy KazLLM tildik mashınasyn iske qosý men Aitu messendjerin qoldanysqa engizý jumystaryn synaǵan edi.
