Kim qan donory bola almaıdy
ASTANA. KAZINFORM — Ótken jyly Qazaqstanda 66 190 adam qan tapsyrýǵa jiberilgen joq. Mamandardyń aıtýynsha, buǵan densaýlyq jaǵdaıymen qatar, donorlyqqa daıyndyq talaptarynyń saqtalmaýy da sebep bolǵan.
Transfýzıologııa ǵylymı-óndiristik ortalyǵy Qoǵammen baılanys jáne yntymaqtastyq bóliminiń basshysy Alma Demeýovanyń aıtýynsha, donorlardy qan tapsyrýǵa jibermeýdiń sebepteri donatsııaǵa deıingi jáne odan keıingi kezeńderge bólinedi.
— 2025 jyly Qazaqstan boıynsha donatsııaǵa deıin 66 190 adam qan tapsyrýǵa jiberilgen joq. Kóbine azamattarǵa gemoglobın deńgeıiniń tómendeýine, qan taldaýy kórsetkishteriniń ózgerýine, baýyr qyzmetin sıpattaıtyn alanınamınotransferaza (ALT) deńgeıiniń joǵary bolýyna nemese densaýlyq jaǵdaıyna baılanysty qan tapsyrýǵa ruqsat berilmeıdi, — dedi spıker.
Sondaı-aq onyń aıtýynsha, ınfektsııa juqtyrý qaýpi joǵary azamattar, eki qan tapsyrýdyń arasyndaǵy belgilengen merzimdi saqtamaǵandar, donatsııa aldynda tamaqtaný tártibin buzǵandar, sońǵy 48 saǵat ishinde alkogol ishken nemese belgili bir dári-dármek qabyldaǵan adamdar qan tapsyra almaıdy.
Al qan tapsyrylǵannan keıin árbir donatsııa zerthanalyq tekserýden ótedi.
— Eger zertteý barysynda V jáne S vırýsty gepatıtteriniń, AITV-ınfektsııasynyń, merezdiń markerleri nemese anti-HBc, anti-HBs kórsetkishterindegi ózgerister anyqtalsa, mundaı donorlarǵa turaqty túrde medıtsınalyq shekteý qoıylady, — dedi bólim basshysy.
Bul talaptar donorlardyń densaýlyǵyn qorǵaýǵa, retsıpıentterdiń qaýipsizdigin qamtamasyz etýge jáne qan komponentteriniń sapasyn saqtaýǵa baǵyttalǵan.
Buǵan deıin tatýırovka men pırsıng jasatqan adamnyń nege qan donory bola almaıtyny jóninde jazdyq.
