Klıaınniń «Kók sharshysy» Christie’s aýktsıonynda 18 mln eýroǵa satyldy

ASTANA. KAZINFORM — Frantsýz sýretshisi Iv Klıaınniń monohromdy týyndysy Christie’s aýktsıonynda rekordtyq 18,4 mıllıon eýroǵa satyldy, dep habarlaıdy Kazinform agenttigi TASS aqparat kózine silteme jasap.

Sóz bolyp otyrǵan shyǵarma — «Kalıfornııa» atty kartına, ony Klıaın 1961 jyly Parıjde salǵan jáne alǵash ret aýktsıonǵa qoıylyp otyr.

Polotnonyń bıiktigi eki metrge jýyq jáne eni tórt metrden asatyn birtekti kók tústi tikburysh. «Kalıfornııa» sýretshiniń shyǵarmashylyǵyndaǵy eń mańyzdy jumystardyń biri bolyp sanalady. Bul kartına sońǵy ret kópshilik nazaryna 2005–2008 jyldary Nıý-Iorktegi Metropolıten mýzeıinde usynylǵan edi. Satyp alýshynyń aty-jóni jarııa etilmegen.

Sondaı-aq Frantsııada ótken taǵy bir aýktsıonda Pablo Pıkassonyń buryn kópshilikke beımálim bolǵan kartınasy satyldy. Drouot aýktsıon úıiniń habarlaýynsha, sýretshiniń «Gúldi qalpaqtaǵy áıeldiń bıýsti» atty eńbegi 32 mıllıon eýroǵa baǵalanǵan.

Bul týyndy 1944 jyldan beri jeke kollektsııada saqtalǵan jáne 80 jyldan astam ýaqyt boıy kópshilikke kórsetilmegen. 24 qazanǵa deıin ol tek fotosýret pen qara-aq reprodýktsııa arqyly ǵana belgili bolǵan.

Aıta kekteıik, buǵan deıin alǵashqy basylymdaǵy «Hobbıt» kitaby aýktsıonda rekordtyq baǵaǵa satyldy.

Al Maıkl Djeksonnyń shulyǵy aýktsıonda 6200 eýroǵa satyldy.