Klýbtar arasyndaǵy ÁCh: «Real Madrıd» chempıon atandy
ASTANA. QazAqparat - Búgin Birikken Arab ámirliginde fýtboldan klýbtar arasyndaǵy álem chempıonaty máresine jetti, dep habarlaıdy QazAqparat tilshisi.
Fınalda Ispanııanyń «Real Madrıd» jáne Birikken Arab ámirliginiń «Al-Aın» komandalary kezdesti. Eki komandanyń atalmysh doda tarıhynda tuńǵysh márte joly túıisip otyr.
«Real Madrıd» komandasy klýbtar arasyndaǵy álem chempıonatyna budan buryn tórt márte qatysyp, 2014, 2016, 2017 jyldarda chempıon ataǵyn jeńip aldy. 2000 jyly tórtinshi orynnan asa alǵan joq. Olar bul dúbirli dodany 19 jeltoqsanda jartylaı fınal kezeńinen bastady. Jartylaı fınalda Japonııanyń «Kasıma Antlers» komandasyn 3:1 esebimen tize búktirdi.
Al «Al-Aın» jarysty pleı-off kezeńinen bastady. Aldymen 12 jeltoqsanda Jańa Zelandııanyń «Tım Vellıngton» komandasymen kezdesti. Ol oıynda negizgi kezeńde 3:3 esebi tirkelip, jeńimpaz penaltı tebý arqyly «Al-Aın» jarysty jalǵastyrýǵa múmkindik aldy. Odan keıin arab fýtbolshylary 15 jeltoqsanda shırek fınalda Týnıstiń «Esperansyn» 3:0 esebimen oısyrata jeńdi. Al 18 jeltoqsanda jartylaı fınalda Argentınanyń «Rıver Pleıt» komandasymen negizgi kezeńde 2:2 esebimen teń túsip, penaltı tebýden jeńimpaz atandy.
Búgingi kezdesýde «Real Madrıd» óziniń tájirıbeli komanda ekenin jankúıer aldynda taǵy bir márte dáleldedi. Aldymen ıspanııalyq klýbtyń jartylaı qorǵaýshysy Lýka Modrıch esep ashty. Qalǵan goldar ekinshi kezezńde soǵyldy. «Real Madrıd» klýbynyń taǵy bir jartylaı qorǵaýshysy Markos Lorente 60-mınýtta esepti ústemelese, 78-mınýtta Serhıo Ramos buryshtamadan áýelete berilgen dopty baspen uryp qaqpa toryn búlk etkizdi. Alań ıeleri de qarap qalǵysy kelgen joq. «Al-Aın» sapynan Tsýkasa Sıotanı 86-mınýtta bir golmen jaýap qaıyrdy. Al 91-mınýtta «Al-Aın» sapynan ıAhııa Nader óz qaqpasyna gol soǵyp aldy. «Real Madrıd» qarsylasynan 4:1 esebimen basym tústi.
Osylaısha «Real Madrıd» komanda tarıhynda tórtinshi márte fýtboldan klýbtar arasyndaǵy álem chempıonatynda jeńimpaz atandy.
Búgin úshinshi oryn úshin saıysta Argentınanyń «Rıver Pleıt» klýby Japonııanyń «Kasıma Antlers» 4:0 esebimen jeńdi. Osylaısha óz jankúıerleri aldyndaǵy jartylaı fınaldaǵy jeńilisin jýyp-shaıǵandaı boldy.
