Klýbtar arasyndaǵy ÁCh: «Real Madrıd» altynǵa talasady
ASTANA. QazAqparat - Búgin fýtboldan klýbtar arasyndaǵy álem chempıonatynyń ekinshi jartylaı fınaly ótti. Fınalǵa beriletin ekinshi joldamany Japonııanyń «Kasıma Antlers» jáne Ispanııanyń «Real Madrıd» klýbtary sarapqa salady, dep habarlaıdy QazAqparat tilshisi.
«Real Madrıd» komandasy klýbtar arasyndaǵy álem chempıonatyna budan buryn tórt márte qatysyp, 2014, 2016, 2017 jyldarda chempıon ataǵyn jeńip aldy. 2000 jyly tórtinshi orynnan asa alǵan joq. Komandanyń budan basqa jetistikterin jankúıer jaqsy biledi.
«Kasıma Antlers» Japonııanyń mańdaıaldy komandasynyń biri sanalady. Japonııanyń segiz dúrkin chempıony boldy. Bıyl AFK Chempıondar lıgasynda jeńimpaz atandy. 2016 jyly klýbtar arasyndaǵy álem chempıonatyna tuńǵysh ret qatysyp, fınalǵa deıin jetti. Sol joly fınalda búgingi qarsylasy - «Real Madrıd» komandasynan qosymsha kezeńde 2:4 esebimen jeńilip qaldy. Oǵan deıin aldymen «Kasıma Antlers» pleı-off satysynda Jańa Zelandııanyń «Oklend Sıtı» klýbyn 2:1, shırek fınalda Ońtústik Afrıka Respýblıkasynyń «Mamelodıin» 2:0, Kolýmbııanyń «Atletıko Nasonal» klýbyn 3:0 esebimen jeńgen edi.
«Kasıma Antlers» bıyl klýbtar arasyndaǵy álem chempıonatyn shırek fınal kezeńinen bastap, aldymen Meksıkanyń «Gvadalahara» klýbyn 3:2 esebimen jeńdi.
Búgingi kezdesýde ıspanııalyq «Real Madrıd» ózderiniń basymdyǵyn baıqatty. Olardyń sapynan Garet Beıl 44, 53, 55-mınýttarda gol soǵyp, het-trık jasady. Oǵan 78-mınýtta «Kasıma Antlers» oıynshysy Sema Doı bir ǵana golmen jaýap qaıyrdy. Osylaısha «Real Madrıd» japondardy 3:1 esebimen tize búktirip, fınalǵa joldama aldy. Olar endi Birikken Arab áimrliginiń «Al-Aın» komandasymen kezdesedi.
Esterińizge sala ketelik, keshe alǵashqy jartylaı fınalda Birikken Arab ámirliginiń «Al-Aın» jáne Argentınanyń «Rıver Pleıt» komandalary kezdesip, oıynnyń negizgi kezeńi 2:2 esebimen teń aıaqtaldy. Penaltı tebýde «Al-Aın» mergendik tanytyp, fınaldyq saıysqa joldama aldy.
Fınaldyq jáne 3-oryn úshin saıys 22 jeltoqsanda ótkiziledi.
