Klýbtar arasyndaǵy ÁCh: Arab komandasy fınalǵa shyqty
ASTANA. QazAqparat - Búgin Birikken Arab ámirliginde fýtboldan klýbtar arasyndaǵy álem chempıonatynyńń jartylaı fınal oıyndary bastaldy.
Alǵashqy jartylaı fınalda Argentınanyń «Rıver Pleıt» komandasymen jergilikti «Al-Aın» klýbtary kezdesti, dep habarlaıdy QazAqparat tilshisi.
Bıylǵy klýbtar arasyndaǵy álem birinshiligi 12 jeltoqsanda bastaldy. Oǵan Eýropadan - Ispanııanyń «Real Madrıd», Ońtústik Amerıkadan Argentınanyń «Rıver Pleıt», Soltústik Amerıkadan - Meksıkanyń «Gvadalahara», Afrıkadan - Týnıstiń «Esperans», Azııadan - Japonııanyń «Kasıma Antlers», muhıt araldary aımaǵynan - Jańa Zelandııanyń «Tım Vellıngton» jáne atalmysh týrnırdiń qojaıyny - Birikken Arab ámirliginiń «Al-Aın» komandalary qatysyp jatyr.
Búgingi kezdesýde «Al-Aın» oıynshylary alǵash bolyp esep ashyp, olardyń argentınalyq qorǵaýshysy Haver Pınola qanjyǵasyn maılady. Oǵan «Rıver Pleıt» sapynan 11 jáne 16-mınýttarda Rafael Borre jaýap qaıyrdy. Al 51-mınýtta «Al-Aın» klýbynyń jartylaı qorǵaýshysy Kaıo tarazy basyn teńestirdi. Bul esep toqsan mınýt túgesilgenshe saqtalyp turdy. Sondyqtan kezdesý overtaımǵa ulasty. Jeńimpaz penaltı tebýden anyqtaldy. Bul joly «Al-Aın» jeńiske jetti. Osylaısha horvat bapkeri Zoran Mamıch jetekshilik jasaıtyn arab klýby pleı-off kezeńinen fınalǵa deıin jetti.
Dúbirli doda 12 jeltoqsanda «Al-Aın» men «Tım Vellıngton» komandalary arasyndaǵy kezdesýmen bastaldy. Ol oıynda negizgi kezeńde 3:3 esebi tirkelip, jeńimpaz penaltı tebý arqyly «Al-Aın» jarysty jalǵastyrýǵa múmkindik aldy. Odan keıin arab fýtbolshylary 15 jeltoqsanda shırek fınalda Týnıstiń «Esperansyn» 3:0 esebimen oısyrata jeńse, dál osy kúni «Kasıma Antlers» klýby «Esperanstan» 3:2 esebimen basym tústi.
Taǵy bir jartylaı fınal oıyny erteń, 19 jeltoqsanda ótkiziledi. Onda «Kasıma Antlers» pen «Real Madrıd» komandalary kezdesedi. Olardyń jeńimpazy 22 jeltoqsanda fınalda «Al-Aın» klýbymen kezdesedi.
Fýtboldan klýbtar arasyndaǵy álem birinshiligi bıyl 15-márte ótkizilip otyr. Dúbirli doda alǵash ret 2000 jyly jalýyn kótergen edi. Búgingi kúnge deıin Ispanııanyń «Barselona» men «Real Madrıd» komandalary úsh-úshten chempıondyq ataqqa qol jetkizdi. Al Brazılııanyń «Korıntıans» klýby eki, «Internasonal», «San-Paýlý», Italııanyń «Mılan», «Internatsıonale», Anglııanyń «Manchester ıÝnaıted», Germanııanyń «Bavarııa» komandalary bir-bir márte altynnan alqa taqty.
