Klýbtar arasyndaǵy ÁCh: «Flýmınense» men «Chelsı» jartylaı fınalǵa shyqty
ASTANA. KAZINFORM - Fýtboldan klýbtar arasyndaǵy álem chempıonatynda jartylaı fınalǵa shyqqan eki komanda anyqtaldy.
Aldymen Brazılııanyń «Flýmınense» jáne «Al-Hılıal» (Saýd Arabııasy) komandalary jasyl alańǵa shyqty.
Týrnırdiń 1/8 fınalynda Anglııanyń «Manchester Sıtı» klýbyn qapy qaldyrǵan «Al-Hılıal» bul joly da qarsylasymen terezesi teń oıyn kórsetti. Aldymen brazılııalyq klýbtan Martınellı 40-mınýtta esep ashsa, Markos Leonardo 51-mınýtta tarazy basyn teńestirdi.
Al 70-mınýtta Erkýles Pereıra dý Nasımentýdyń soqqan goly brazılııalyq klýbqa jeńis alyp keldi. Osylaısha «Flýmınense» qarsylasyn 2:1 esebimen tize búktirip, jartylaı fınal joldamasyna ıe boldy.
Taǵy bir kezdesýde «Palmeıras» (Brazılııa) men «Chelsı» (Anglııa) sheberlik baıqasty. Oıyn barysynda anglııalyq klýbtan Koýl Palmer 16-mınýtta mergendik tanytsa, oǵan «Palmeıras» sapynan Estevao bir golmen jaýap qaıyrdy.
Oıyn taǵdyryn 83-mınýtta brazılııalyq klýbtan Vevertonnyń avtogoly sheshti. Nátıjesinde «Chelsı» qarsylasynan 2:1 esebimen basym túsip, jartylaı fınalǵa shyqty.
Endi 8 shildede «Flýmınense» men «Chelsı» 1/2 fınalda oınaıdy.
Endi búgin, 5 shildede shırek fınalda 21:00-de «Parı Sen-Jermen» (Frantsııa) men «Bavarııa» (Germanııa), 00:50-de «Real Madrıd» (Ispanııa) men «Borýssııa Dortmýnd» (Germanııa) kezdesedi.
Álem chempıonatynyń júlde qory – 1 mıllıard AQSh dollary. Atalǵan týrnırde chempıon bolǵan komanda 125 mıllıondy ıelenedi. Qalǵan qarajatty qatysýshy 31 klýb alǵan oryndaryna baılanysty bólisedi. Dop dodasynda 32 komanda synǵa túsip jatyr.
