Klýbtar arasyndaǵy ÁCh: Búgin «Flýmınense» men «Chelsı» fınal joldamasyna talasady

ASTANA. KAZINFORM - Fýtboldan klýbtar arasyndaǵy álem chempıonatynda búgin jartylaı fınalda «Flýmınense» (Brazılııa) men «Chelsı» (Anglııa) sheberlik baıqasady.

Kezdesý qazaqstandyq ýaqytpen saǵat 23:50-de bastalyp, «Qazsport» telearnasynan tikeleı efırde kórsetiledi.

Toptyq kezeńde «Flýmınense» F tobynda Germanııanyń «Borýssııa Dortmýnd» jáne Ońtústik Afrıkanyń «Mamelodı Sandaýns» klýbtarymen 0:0 esebimen teń oınasa, Ońtústik Koreıanyń «Ýlsan Hende» komandasyn 4:2 esebimen tize búktirdi.

Odan keıin 1/8 fınalda Italııanyń «Interin» 2:0 esebimen jeńse, 1/4 fınalda Saýd Arabııasynyń «Al-Hılıalyn» 2:1 esebimen orta jolda qaldyrdy.

Al «Chelsı» D tobynda AQSh-tyń «Los-Andjelesin» 2:0, Brazılııanyń «Flamengosyn» 3:1, Mysyrdyń «Esperansyn» 3:0 esebimen jeńdi.

Kelesi kezekte 1/8 fınalda Portýgalııanyń «Benfıkasyn» 4:1, 1/4 fınalda Brazılııanyń «Palmeırasyn» 2:1 esebimen tize búktirdi.

Aıta ketsek, Álem chempıonatynyń júlde qory – 1 mıllıard AQSh dollary. Atalǵan týrnırde chempıon bolǵan komanda 125 mıllıondy ıelenedi. Qalǵan qarajatty qatysýshy 31 klýb alǵan oryndaryna baılanysty bólisedi.

Dop dodasynda 32 komanda synǵa túsedi. Opta sýperkompıýteri 2025 jylǵy álem chempıonatynda qaı komandanyń jeńimpaz atanýy múmkin ekeni jóninde boljam jasady.

Atalǵan boljamǵa sáıkes chempıonattyń basty favorıti retinde Frantsııanyń «Parı Sen-Jermen» komandasynyń múmkindigi 18,5% paıyzǵa baǵalanady.