Klýbtaǵy kisi ólimi: eki jábirlenýshi qashyp úlgergen
Aqtóbe oblystyq qylmystyq ister jónindegi mamandandyrylǵan aýdanaralyq sotynda Qylmystyq kodekstiń «Kisi óltirý», «Buzaqylyq», «Adamdy urlaý» baptary boıynsha is qarala bastady.
Búgin sot aldy tyńdaýy ótti. Oǵan 16 aıyptalýshy ákelindi. Sonymen birge, is boıynsha 6 jábirlenýshi bar. Onyń ekeýi - qashyp, aman qalǵandar. Al ekeýi - ólgen adamdardyń týystary. Sot aldy tyńdaýy kezinde aıyptalýshylardyń jeke basy anyqtaldy. Olardyń týǵan kúni men týǵan jeri, mekenjaıy naqtylandy. Bári de aıyptaý aktisin aldy, ispen tanys.
Іs materıalyna súıensek, buryn sottalyp, jazasyn ótep shyqqan Hangeldi Muhanbetshárip, qylmystyq ortada «Sary Jasık» atymen tanymal Janserik Işanov zańsyz «kúzet qyzmetin» mindetine alady. Ol úshin janyna sportqa beıim birneshe adamdy jınaıdy. Arasynda kámelet jasqa tolmaǵany da bar. 2022 jyldyń aqpan aıynan bastap Işanov Aqtóbe qalasy Astana aýdanynda ornalasqan túngi klýbty jalǵa alýshy Qarataevpen aýyzsha kelisip, «kúzet qyzmetin» uıymdastyrdy. Kúzetshiler retinde qyzmet atqarýǵa Muhanbetshárip, Túktibaı, Isengarın, Jańbyrbaev, Qosanov, Myrzabaev, Ermanov, Jıenalın, Serikuly, Baqytov, Týkenov, jasa kámeletke tolmaǵan Mýkanbetjanovty jınaqtaǵan.
«Işanov karaoke men túngi klýbtardy kúzetkeni úshin zańsyz jalaqy bolatyn 1 mln 600 myń teńgeni Qarataevtan alyp, adamdar arasynda óz betinshe bóldi. 2022 jyldyń aqpan aıynan bastap 2022 jyldyń 26 qazanyna deıin polıtsııaǵa túngi klýbqa qatysty túrli mátindegi qylmystyq jáne ákimshilik quqyqbuzýshylyq týraly 66 habarlama túsken. 2022 jyldyń 26 qazany kúni saǵat 00:04 shamasynda «Mıllıarder» túngi klýbyna jábirlenýshiler Kóshkinbaev, Jaqypov, Tóleýov, Temirov demalýǵa barady. Olar kire beriste aqsha tólemeı, ishimdikke tapsyrys beredi. Sodan soń kúzetshi Hasenov pen Túktibaı jábirlenýshi Kóshkinbaevtyń is-áreketine ishteı ashýlanyp, basshysy Işanovqa qońyraý shalady. Işanov qazaǵa ushyratýdy buıyryp, ózi jáne Baqytov, Týkenov kele jatqanyn aıtady. Óz kezeginde Túktibaı Işanovtyń ózine bergen buıryǵyn qalǵandaryna jetkizgen. 2022 jyly 26 qazanda saǵat 00:05 shamasynda túngi klýb ishinde barmen bolyp jumys isteıtin Maksım Aleksandrov Hasenov pen Túktibaıǵa júgirip kelip, jábirlenýshilerdi meńzep, bardan alǵan spırttik ishimdikterge aqy tóleýden bas tartqanyn aıtady. Mýkanbetjanov sybaılasy Işanovtyń kisi óltirýge berilgen buıryǵyn oryndaý maqsatynda Kóshkinbaevty klýbtan shyǵaryp sóılesedi. Hasenov óziniń sybaılastary Isengarın men Qosanovpen birge jábirlenýshi Kóshkinbaevty uryp, jerge qulatyp, basynan, denesinen tebedi. Turmystyq sharýashylyqqa arnalǵan pyshaǵyn Kóshkinbaevtyń sol jaq sanyna birneshe ret tyǵyp alǵan. Hasenov ári qaraı Jaqypovty uryp jatqanyn paıdalanyp, sol jaq sanyna bir ret pyshaq tyǵyp alǵan», - dedi sot aldy tyńdaýy kezinde prokýror.
Kúzetshi men túngi klýbqa kelgen adamdar arasyndaǵy tóbeles aldymen dalada bolǵan. Keıin soqqydan zardap shekken jábirlenýshilerdi bir top aıyptalýshy ishke kirgizip urady. Adamdardyń soqqy alǵanyn sol kezde túngi klýbta bolǵan demalýshylar kórgen. Oqıǵa kópshilik arasyna tarap ketpeýi úshin aıyptalýshylar kólikpen olardy qala syrtyna alyp ketýdi oılastyrady. Sóıtip, birin kóliktiń ishine, ekinshisin júksalǵyshqa salyp, qala ishimen júredi. Sol kezde júksalǵyshta jatqan jábirlenýshi Jaqypov qashyp ketip, ashanaǵa jetip úlgeredi, adamdardan kómek suraıdy. Al sońynan qýǵan Muhanbetshárip pen Myrzabaev birden boı tasalaıdy. Ekinshi kólikte otyrǵan jábirlenýshi Temirov te kólik baǵdarshamǵa toqtaǵan kezde qashyp, jan saqtaıdy. Al kólik ishindegi aıyptalýshylar qalanyń Nokın dańǵylyndaǵy jaǵajaı mańyna Kóshkinbaevtyń, Tóleýovtiń denesin tastap ketedi.
Negizgi sot otyrysy 11 tamyz kúti bastalady.
