KLM kompanııasynyń ushaqtary Taıaý Shyǵys elderi arqyly ushpaıtyn boldy

ASTANA. KAZINFORM – KLM áýe kompanııasynyń ushaqtary óńirdegi jaǵdaıdyń shıelenise túsýine baılanysty Taıaý Shyǵystyń birqatar baǵytymen ushýdy toqtatty, dep habarlaıdy NU.nl.

Tasymaldaýshy kompanııa Iran, Irak, Izraıl jáne Parsy shyǵanaǵyndaǵy birqatar eldiń ústinen ushýdy ýaqytsha toqtatatynyn jarııalady. Sonyń saldarynan qazir Dýbaı, Tel-Avıv, sondaı-aq Saýd Arabııasynyń Er-Rııad pen Dammam qalalaryna baǵyttalǵan reıster toqtatyldy.

KLM ókiliniń aıtýynsha, reısterdiń toqtatylýy geosaıası jaǵdaımen baılanysty.

Onyń sózinshe, tıisti sheshim juma kúni qabyldanǵan. Áýe kompanııasy bul qadamnyń aldyn alý sıpatynda ekenin atap ótedi. Ádette mundaı sheshimder qabyldar aldynda KLM Nıderland úkimetimen keńesedi. Qansha ýaqytqa deıin reısterdiń toqtatylatyny ázirge belgisiz.

Air France pen British Airways te juma kúni Dýbaı men ózge baǵyttarǵa ushatyn reısterin toqtatty. Degenmen áýe keńistigi tolyq jabylǵan joq. Emirates Birikken Arab Ámirlikterindegi óz habyna áli ushyp júr.

Qansha jolaýshynyń Taıaý Shyǵysta qalyp qoıýy múmkin ekeni beımálim.

KLM ókiliniń aıtýynsha, mysaly, Dýbaıda qalyp qoıǵan jolaýshylar áli jumys istep jatqan ózge áýe kompanııalarynyń reısterine bıletterin aqysyz qaıta brondaı alady. Alaıda KLM ózi bul baǵyttar boıynsha ushpaıdy.

Kompanııa ókili atalǵan sharalar KLM-niń Azııa baǵyttaryndaǵy ushý ýaqyty uzarmaıtynyn atap ótti, sebebi sońǵy ýaqytta áýe kompanııasy Iran men Irak ústinen onsyz da usha bermeıtin.

Eske salaıyq, Iranda birneshe aptadan beri aıatolla Álı Hameneı rejımine qarsy aýqymdy narazylyq sherýleri ótip jatyr. Bılik tarapynan jasalǵan zorlyq-zombylyq saldarynan, myńdaǵan sherýshi qaza tapqan.

Tramp Iran baǵytyna amerıkalyq «armada» jiberiletinin málimdedi.